adminYiNtatheli kaMthunywa
INHLANGANISO yeBasketball Union of Zimbabwe iphakathi kwetshe lembokodo nanko phela isikhangelane lokwehluleka ukuhambisa iqembu okumele lidlale kumncintiswano we Afro-basketball eTunisia ngenyanga ezayo.
Umongameli weBUZ uAddison Chiware utshele iphephandaba likazulu ngoLwesithathu ukuthi sebeswela ubuthongo ngokudinga labo abangancedisana labo ukuze ithimu yesizwe iyencintisa.
Iqembu leZimbabwe lifuna imali efika $200 000 ukuze lilungiselele lokuthi lenelise ukuya emdlalweni yeAfro-basketball le.
Uthe inhlanganiso yabo isibumbe ikomithi ephiwe umlandu wokuqoqa amankampani lengatsha ezingancedisa kuloludubo.
“Siphezulu kokukhulumisana labantu abangenelisa ukuphathisa ngemali ikakhulu amankampani. Silokwethemba ukuthi sizahlanganisa konke lokhu inyanga kaNtulikazi ingakapheli.
UChiware uthe inhlanganiso yeBUZ iqoqe ukuthi nxa imali isikhona, ithimu yesizwe iyelungiselela imidlalo yomncintiswano ingaphandle kwesizwe ukuze ijwayele umkhathi waseTunisia.
“Sifisa ukuthi iqembu leZimbabwe liyelolonga ngaphandle kwelizwe kuseselesikhathi. Imali ingabakhona kuzakubalula ukukwenza konke lokhu,” nguChiware lo.
IZimbabwe izadlala leAlgeria kumdlalo wakuqala mhlaka 20 kuNcwabakazi.
Kusukela kuMabasa ithimu ibisikhethiwe njalo kwabizwa abadlali abangu-48 kodwa abaqeqetshi sebesuthiseke ngabangu-20. Okwamanje kulolonga abadlali abalitshumi lambili.
Online Reporter