adminYiNtatheli kaMthunywa
KUSASA amaqembu ezikolo avuthisa inkundla zeMaphisa kumidlalo yokucina yeNgwebu Inter-Primary Schools Soccer Tournament lapho okuzadibana izikolo ezine.
Lonyaka isabelo seMatabeleland South sizamelwa yiTongwe eyeBeitbridge kuthimu yabafana, isikolo seNkazhe esiseGwanda siza lethimu yamankazana. Isabelo lesi silemvumo yokukhetha izikolo ezimbili iLongfields yaseMzingwane kanye leBrunapeg yeMangwe.
IMat North izadlalelwa yiLoziba kubafana, iTurk Mine ingenisa amankazana, esabelweni sakoBulawayo kuleMazwi leNdlovu Iyanyathela.
ITongwe izathembela kumgadli wayo uDean Mbedzi, njalo kuzamele isebenzele ukulungisisa abadlali bayo bangemuva okukhanya bayalala nxa bethwe bahlaselwa.
Umgcinisihlalo weNational Association of Primary Heads (Naph) esabelweni seMatabeleland South uElton Sonyosi uthe umncintiswano we-final yalonyaka uzahlabusa okwedlulisileyo.
“Njengoba iMat South kuyiyo enxusa ezinye izabelo, inguqu yeNgwebu lonyaka izakhunjulwa ngabantu bonke ngoba sizimisele.
“Sibonga inkampani yeNgwebu ngokusekela ithalenta labantwana abasezikolo ze-Primary. Kuyajabulisa kakhulu ukubona ikusasa yelizwe isekelwa ngalindlela.”
USinyosi ukhuthaze izakhamizi labathandi benguqu ukuthi baze ngobunengi babo enkundleni zesikolo seMinda kanye lenkundla kazulu esenzikini yezitolo zeMaphisa.
Kusukela ngenyanga kaNhlangula, izikolo zincintisane ezabelweni anduba kusale intshantshu ezizadlala kusasa.
Phezu kwalokhu, ukudlala kwamathimu amakazana ezikolo sekuphakamise isisindo salumncintiswano. Inkampani yeNgwebu ngeyokuqala ukusekela umdlalo wenguqu yamankazana ezikolo zemfundo ye-primary.
Ukubusa kwezikolo zemadolobheni kuphelile lonyaka, nanko phela izikolo zemaphandleni zizimisele ukuthi inkezo isale, ikakhulu eMatabeleland North.
Lonyaka umncintiswano weNgwebu uguqukile ngokufaka isinqumo sokuthi izikolo zonke zigqoke ama-boots.
Kuminyaka edluleyo, inkezo le ibilemthetho elula ekuthini amanye amathimu ayelabadlali abalikhaba ngenyawo.
Inengi lezikolo zemaphandleni beziswela impahla eyeneleyo okuyikho okwenza zibhuqwe ngezisemadolobheni.
Inhlanganiso yabaphathi bezikolo ze-primary iNational Association of Primary Heads (Naph), ibika ukuba iyasuthiseka ngosizo lweNgwebu.
Abahlawuleli benkezo bazaphathisa izikolo ngama-boots la kanye lama-kit kusigaba sama-final.
Online Reporter