admin
YiNtatheli kaMthuywa
UNKOSIYAZI Sibanda ubika ukuba kasoze atshiywe ngumuntu lonyaka mhla kugijinywa umjaho weEconet Marathon edolobheni leFolosi.
USibanda nguye intshantshu yanyakenye ngemva kokuphutsha kuqala umango wamakhilomitha angu-42.
Watshiya bonke emncintiswaneni wanyakenye ngamahola amabili nje (2.19. 11 sec).
Lonyaka ubhekane lokwenza okufanayo mhlaka 28 kulinyanga.
“Ngilungiselele ngaphelela. Imjaho enjengale iqakathekile kithi abagijimayo. Ngilethemba lokuthi ngizaqhuba kuhle, ngenelise ukuthi nginqobe abanye,” nguSibanda lo.
Umjaho lo uqhutshwa minyaka yonke yinkamapani yabomakhalekhukhwini i-Econet Zimbabwe.
Obona ngezokukhitshwa kwembiko kunkampani le uLydia Fambarega ubikele iphephandaba likazulu ukuthi umncintiswano walonyaka uzabe umkhulu. Uthe kulabagijimayo abanengi abazaphatheka kuwo.
“Umncintiswano lo siwuqhuba sibamabene lenhlanganiso yeNational Athletics Association of Zimbabwe (Naaz) njalo sesabhalisa laku-International Marathon and Distance Races (AIMS),” kutsho uFambarega.
Lumncintiswano unikeza abagijimi basekhaya amathuba amanengi ngoba abagijimi laba balakho ukuncintisana lezinye ingcitshi ezilesiqubu ezivela emazweni afana labo Canada kanye lamanye aphetsheya.
“Lonyaka kuzabe kulomunye umncintiswano njalo owe-Econet Half Marathon Corporate Challenge. Lapha ke kuzancintisa abamankampani ehlukileyo ngenhloso yokuthuthukisa ubudlelwano. Abazanqoba ke emncintiswaneni lo bazazitholela inkezo,” kutsho uFambarega.
Umncintiswano weEconet Victoria Falls Marathon wandise ukuba lebizabiza sibili ngoba abagijimi abangedlula 600 babaphatheke emncintiswaneni lo.
Amazwe ehlukeneyo abalisela iZimbabwe, Canada, Spain, Sweden, USA, New Zealand, Japan kanye le Ethopia kawaswelakali emncintiswaneni lo.
Online Reporter