Maamburenzi evarwere vetb

Health and Child Care Minister Dr David Parirenyatwa and his deputy Aldrin Musiiwa and deputy Mayor of Harare Chris Mbanga have a look at a new digital X-ray machine during its commissioning at Wilkins hospital in Harare yesterday.-Picture by Munyaradzi Chamalimba

BAZI rezveutano nekurerwa kwevana svondo rapera rakabatsirwa nemaamburenzi masere pamwe nemichina yekuvhenekesa chirwere cherurindi (TB) pasi pehomwe yeGlobal Fund izvo zvinotarisirwa kusimudzira zvikuru nyaya dzeutano munyika.

Maamburenzi nemichina iyi zvichaendeswa kuzvipatara zviri kumatunhu akatsaukana muZimbabwe.

Michina yekuvheneka chirwere cherurindi iyi inosanganisira yemhando ye”audiometric machine” neyemaX-ray uye ichabatsira mukurapwa kwevarwere avo vairarama kwemakore mazhinji vasingazive kuti vane denda iri, zvikuru iro risingarapike nyore (Drug Resistant Tuberculosis (DRTB).

Vachitaura pakukumikidzwa kwemaamburenzi aya nemichina iyi pachipatara cheWilkins Hospital, muHarare, gurukota rebazi iri, Dr David Parirenyatwa, vanoti rubatsiro urwu rwakakosha mukusimudzira utano munyika.

“Rubatsiro urwu rwuri kunyanya kunangana nevanhu vanotambura, vana, vakwegura nevanogara munzvimbo dzakamanikana uye rwuine chinangwa chekuderedza chirwere cherurindi.

Maamburenzi aya achabatsira mukutakura varwere verurindi.

“Chirwere ichi ndicho chiri pamusoro pakuuraya pasi rose saka kuburikidza nemushandirapamwe uyu, tinoda kuti chinge chichiderera mukupararira uye michina iyi ichabatsira kuti varwere vange vachivhenekwa kuti vagone kurapwa nenguva,” vanodaro.

Dr Parirenyatwa vanoti rurindi kana rwukanonoka kurapwa, murwere anogona kuzoguma asingachanzwe zvakanaka.

“Chirongwa cheGlobal Fund chichaenderera mberi nekubatsira muzvipatara. Maamburenzi aya achange achitutsira pane mamwe makumi maviri akambowaniswa kuzvipatara izvi pasi pechirongwa ichi,” vanodaro.

VaDonald Tebayo, avo vanova murongi mukuru anomiririra nyika ino muchirongwa cheGlobal Fund, vanoti pane budiriro huru iri kuitwa nesangano iri mukurwisa chirwere cherurindi icho chadzika midzi (DRTB) kuburikidza nekuwanisa zvipatara zvekushandisa zvakakwana..