daniel chigunwe
Abel Ndooka
CHIKWATA chenyika checricket chemaChevrons chakasvika kuEngland kuLeicester uko chakatanga kuita gadziriro dzekuzosangana neEngland mumutambo weTest match uchazotambirwa kuTrent Bridge kuNottingham.
MaChevrons nemaThree Lions achasangana mumutambo weTest match kutanga nemusi wa22 uchizopera musi wa25 Chivabvu.
Apo maChevrons achange achiita gadziriro dzavo, achambotamba mitambo yehushamwari izvo zvichaona vachisangana nezvikwata zveFirst Class Counties kutanga musi wa15 kusvika musi wa18 Chivabvu kuUptonsteel County Ground kuLeicester.
Achitaura vachangosvika kuEngland, murairidzi wemaChevrons – Justin Sammons – muchinyorwa chakabva kuZimbabwe Cricket anoti: “Zuva range rakanaka. Takafamba rwendo rurefu kubva kuHarare tichiuya kuLeicestershire. Saka munoziva, musi weSvondo range riri zuva rekuzorora panhau yekudzoreredza nyama panzvimbo – Curtly (Diesel, strength and condition coach) ange ane vatambi vachiita izvozvo.
“Kuchiti nhasi zuva rekutanga tiri munhandare nekumaneti. Ndinofunga kuti zvange zvichifamba zvakanaka. Saka ndiri kufara nemafambiro azviri kuita zvese.”
Sammons akaenderera mberi achiti chero zvazvo chikwata chake chakafamba rwendo rurefu urwu kuenda kuEngland uko vamwe vasati vamboendako, vari kutarisira kusangana neEngland mumutambo uyu weTest match.
“Vakomana vari kufara vachiita gadziriro, ndinoti handifunge kuti tingatarisire zvimwe zvinodarika kuuya kuzotamba nechimwe chezvikwata zvikuru pasi rino, zvinotamba mitambo yeTest match,” anodaro Sammons.
Zimbabwe paichapedza kutatsurana neEngland, ichasangana neSouth Africa mune mumwe mutambo weTest match uyo uchatambirwa kuArundel kutanga musi wa3 kusvika musi wa6 Chikumi.
Mutambo uyu uchabatsira zvikuru chikwata chemaProteas icho chiri kugadzirira kuzosangana neAustralia mufainari yemutambo weICC World Test Championship uchatambirwa kuLord’s kutanga musi wa11 kusvika musi wa15 Chikumi.
Online Reporter