daniel chigunwe
Abel Ndooka
MUZVINABHIZIMISI wechidiki ari kusimukira – Tawana Mavhundura – okurudzira vamwe vechidiki kuti vasagarire maoko avo asi vamashandise kuita mabindauko akasiyana-siyana anounza pundutso inokwanisa kuvawanisa raramo.
Muvhundura, uyo ane makore 21 ekuberekwa, ane kambani yake inonzi Muphael Feeds iyo inogadzirira chikafu chezvipfuyo zvinosanganisira huku, nguruve nemombe.
Muhurukuro neKwayedza, Muvhundura anoti chakamutuma kupinda mubhizimisi iri kuzvipira kushanda nesimba uye kuda kuona pundutso muhupenyu hwake pamwe nekusimudzira vamwe vechidiki.
“Kutanga bhizimisi hachisi chinhu chiri nyore sezvo zvinotoda hushingi, naizvozvo munhu unotofanira kushanda nesimba uye wakazvipira pabasa raunenge uchiita.
“Ndinoda kukurudzira vamwe vechidiki vakaita seni kuti ngatishande nesimba, tishandise maoko edu nepfungwa dzedu, kune zvakawanda zvekuita izvo zvekuti takazvipira tinoita mari toraramisa mhuri dzedu kwatakabva uye nekusimudzira nyika yese.
“Ngatisaswera tichiita zvekudhakwa nekuti mukudhakwa hamuna zvinobuda, tinenge tichitongotambisa nguva pasina kwatiri kuenda,” anodaro Muvhundura.
Anoti kambani yake ine chirongwa chairi kuita chekubatsira vechidiki vanenge vakanganiswa nekutora zvinodhaka kuburikidza nekudzidzisa vechidiki.
“Tiri panhau yezvinodhaka, zvakanganisa hupenyu hwevechidiki vakawanda saka iniwo ndakatora chikamu chekubatsira vechidiki vanenge vanyudzwa nezvinodhaka kuvabvisa imomo tovapinza mabasa kuti vawane zvekuita.
“Vechidiki havafanire kusiiwa vari vega nekuti vanopedzisira vakanganisika saka tinovadzidzisa mabasa akasiyana tovarumura kuti vachinozvimirira vega izvo zvinotobatsira kusimukira kwehupenyu hwavo,” anodaro.
Muvhundura kana asiri kuita zvebhizimisi rake anenge ari kuZimbabwe Ezekiel Guti University (ZEGU), kuBindura uko ari kuita zvidzidzo zvehugweta.
Online Reporter