Online Reporter
Muchaneta Chimuka
MAGWINYA kare ainyanya kudyiwa kumaruwa asi iko zvino atekeshera kunyangwe nemumadhorobha zvokuti ave kutotengeswa muzvitoro zvikuru nedzimwe nzvimbo.
Tinowana macarbohydrates nemaprotein kubva muchikafu ichi.
Svondo rino, tiri kubikirwa kudya kunonaka kwemagwinya naRopafadzo Marufu wekuWedza.
Zvinodiwa
Furawa;
Tsvigiri;
Mazai maviri;
Yeast;
Mbatatisi dzakagayiwa;
Chipunu;
Munyu;
Mafuta;
Poto;
Forogo;
Kadhishi
Mabikiro
Isa makomichi mana efurawa mukadhishi.
Kanda zvipunu zvina zvetsvigiri nezviviri zvemunyu.
Pwanya mazai maviri, woisa zvakare.
Isa chidumbu chechipunu cheyeast.
Kanda mbatatisi dzakagayiwa uye dzakafashaidzwa, wosanganisa kusvika zvakora.
Umba zvawakanya zviya uchiita mabhora madiki.
Gadza pamoto poto ine mafuta akawanda, siya apise, wokanda mabhora aye efurawa awaumba.
Ona kuti zvaibva zvose nemukati, uchibaya neforogo.
Magwinya kana aibva, anoonekwa nekutsvukira kunze uye mukati mawo ukamubaya, furawa hairembenuki.
Wozodii?
Kana zvadai, chibura udye nemhuri. Unogona kuadya uchidzikisira nesvutugadzike ine mukaka kana isina, maheu kana zvimwe zvinwiwa zvaunofarira.
Sunungukai kutumira zvamunoda kuti zvibude pachirongwa chino panhamba dzinoti: +263773394753 kana 0713411281 kana email: muchaneta.chimuka@ zimpapers.co.zw
