admin
Kingstone Mapupu —
MUMIRIRI weMudzi North mudare reNational Assembly — Cde Newton Kachepa — vokurudzira varimi kuti vashandise madiridziro zvizere senzira yekudzinga nzara.
Muhurukuro neKwayedza, Cde Kachepa vanoti kunaya kwemvura zhinji mwaka uno chikomborero chikuru kuvarimi sezvo madhamu akawanda kumativi mana enyika, kusanganisira kuMudzi, azere nemvura iyo varimi vanogona kuzoshandisa mumwaka wechirimo.
Zvisinei, vanoti mudunhu ravo havana madhamu makuru sezvo muine maduku chete ayo anoshandiswa nevarimi vane mishandirapamwe yekurima zvirimwa zvinovapa mari.
“Donzvo rangu saMP weMudzi North tinoda kushandisa mvura yose yakachengetedzwa ingava shoma kana kuti yakawanda. Mudunhu rangu mune madhamu maduku anosanganisira Dzongwe, Dendera, Nyamombe neKudzwe ayo takaisa zvikwata zvevarimi vanorima mbesa diki vachizviwanira mari,” vanodaro.
Vanoti hurongwa hwavo ndehwekuwana michina midiki yemadiridziro yedrip irrigation.
“Vechidiki vanorima vari padhamu reKudzwe vari kurima zvinosanganisira butternuts, matomatisi, muriwo, derere nechibage chemuchirimo. Zvimwe vanotengesa munharaunda iyi nekuendesawo muzvikoro nekunzvimbo dzemabhizimisi dzakaita seKotwa,” vanodaro Cde Kachepa.
Dunhu ravo, vanodaro Cde Kachepa, harinaye mvura zvakanaka nekudaro mwaka uno vanotenda kuti mvura yakanaya zvikuru yakazadza madhamu nenzizi zvose.
“Zvakadai tiri mubishi kutsvaga michina yemadiridziro edrip irrigation kubva kune vanobatsira kuti tiyamure varimi vedu. Tiri kubatsira zvakare varimi vedu nembeu dzinofambirana nedunhu redu rinopisa zvikuru,” vanodaro.
Vanoti chikumbiro chavo chikuru kuHurumende ndechekuti mudunhu ravo muvakwe madhamu makuru kuitira kuti varimi vakawanda vabatsirike nemadiridziro.
“Tine nzizi dzakawanda mudunhu medu dzinoda kuti tigoshandisa mvura irimo asi dambudziko redu guru nderekuti nzizi idzi hadzichabata mvura nekuda kwegukuravhu zvinoda kuti jecha rakazaramo rikukurwe kosara madziva chaiwo,” vanodaro.
Vanoti zvirongwa zvemadiridziro zvinobatsira zvikuru sezvo zvichiwanisa vanhu mabasa pamwe nekusimudzira hupenyu wavo.
Online Reporter