Online Reporter
Yeukai Karengezeka
MUKURU wechechi yechipositori Madzibaba Ishmael Chokurongerwa (55) akapihwa mutongo wekugara mujeri kwemakore makumi maviri nedare redzimhosva nemusi weChipiri svondo rino nekuda kwemhosva yekubata chibharo.
Zvakaonekwa nedare kuti aka kakange kasiri kekutanga Madzibaba Ishmael achipara mhosva sezvo akambotongerwa mhosva yemhirizhonga mugore ra2015.
Madzibaba Ishmael akabata chibharo ndokuitisa pamuviri mwanasikana asati abva zera uyo anove munamati wemuchechi yake.
Mutongi Mai Estere Chivasa vakapa mutongo uyu vachishora Madzibaba Ishmael nekutadza kushandisa chinzvimbo chake muchechi yake chekutungamirira vanamati izvo zvakaona achishandisa masimba ake kushungurudza vanhu vaainamata navo.
Vanoti Madzibaba Ishmael inhubu uye ane hutyinye hwakanyanya.
“Vakuru vemachechi vanotarisirwa kupa mucherechedzo wakanaka kuvateveri vechechi dzavo, izvo zvakaitwa nemusungwa uyu kutsaudzira kukuru zvinopesana nezvinotarisirwa kwaari,” vanodaro Mai Chivasa.
Vanoti mumhan’ari aitya zvikuru kuburitsa zita remuridzi wemwana waakabara uye Madzibaba Ishmael akaita kuti mwana uyu ave panjodzi yekumutapurira zvirwere zvepabonde kusanganisira HIV.
Mai Chivasa vanoti zvakakosha kuti dare ripe mutongo unoita kuti vamwe vane mifungo yakaipa kudai vatye kupara mhosva dzerudzi urwu.
“Murume uyu akakanganisa pfungwa dzevanhu vakawanda vemuchechi yake kusvika pekupedzisira, akatora vanhu vemuchechi yake kuvaita vanhu vake nezvimisikidzo dzemifungo yake,” vanodaro Mai Chivasa.
