Online Reporter
Kingstone Mapupu
MOTOKARI dzinosvika nhanhatu dzemhando yeHonda Fit Old Shape, idzo dzinokosha US$20 000, dzaive dzabiwa kunzvimbo dzakasiyana kuGweru dzakawanikwa nemapurisa
eZimbabwe Republic Police (ZRP).
Vakafanobata chigaro chemutauriri wemapurisa kudunhu reMidlands, Assistant Inspector Mollidias Zivuku, vanoti motokari idzi dzakabiwa kubva musi wa26 Kurume gore rino kusvika musi wa16 Kubvumbi.
Motokari dzakawanikwa idzi dzinosanganisira ine ruvara rweblue nenhamba dzinoti ADX 2159 iyo yakabiwa kuAscot Extension nemusi wa26 Kurume ikazowanikwa kunzvimbo yePfende Plots kuGweru nemusi wa29 Kurume.
Pane motokari yerudzi rweHonda Fit yeruvara rwesilver ine nhamba dzinoti AEB 6712 yakabiwa kuMtapa Section 2 kuGweru nemusi wa28 Kurume ikazowanikwa muguta reGweru nemusi wa29 Kurume.
“Tinewo Honda Fit Old Shape yeblue ine nhamba dzinoti AEJ 2797 yakabiwa kuAscot Extension nemusi wa1 Kubvumbi gore rino ra2026. Motokari iyi yakazowanikirwa mumusha weRidgemont kuGweru nemusi wa2 Kubvumbi gore rino. Zvakare, tine Honda Fit Old Shape yeruvara rweblue ine nhamba dzinoti AFP 1511 yakabiwa kuOld Ascot nemusi wa2 Kubvumbi ichibva yazowanikwa muguta reGweru,” vanodaro Asst Insp Zivuku.
Imwe motokari yakawanikwawo iHonda Fit yeruvara rwesilver ine nhamba dzinoti AEI 2623 iyo yakabiwa kuAscot Extension nemusi wa4 Kubvumbi ikazowanikirwa kuRiverside kuGweru nemusi wa7 Kubvumbi.
“Tinotenda basa remapurisa nekushanda kwavo zvine simba neruzhinji. Tine motokari yeruvara rwuchena Honda Fit Old Shape ine nhamba dzinoti AEQ 7201 yakabiwa kuOld Ascot nemusi wa16 Kubvumbi ikazowanikirwa kuCecil Hotel kuGweru muguta nemusi wa16 Kubvumbi,” vanodaro Asst Insp Zivuku.
Vanoti motokari dzose dzakawanikwa idzi dzinokosha mari inozvika US$20 000.
Zvakadai, Asst Insp vanokurudzira zvakare veruzhinji kuchengetedza midziyo yavo yakadai semotokari kudzimba nekugadzira magaraji anokiiwa pamwe nekuisawo makamera nema“alarm”.
“Motokari ngadzisiiwe dzakakiiwa nguva dzose zvisinei kuti vatyairi muri kuenda panzvimbo dziri padyo sei. Motokari dzerudzi rweHonda Fit Old Shape zvinotaridza kuti dziri kunyanya kubiwa inova tsvakurudzo yatiri kuita semapurisa nenyanzvi dzezvemotokari kuti sei zviri kudaro,” vanodaro Asst Insp Zivuku.
