Online Reporter
Abel Ndooka
MUIMBI wechitendero Sidiya Sande, uyo anonyanya kuzivikanwa saMai Nyamande, akabura dambarefu rake rokutanga rinonzi “Waita Mari”, iro rinodzidzisa vanhu kuti vazvininipise.
Dambarefu iri rine nziyo dzinosanganisira “Waita Mari”, rwaakaimba naTocky Vibes; “Izhinji”; “Nyika Ine Minzwa”; “Zvichanaka”; uye “Ndimirire”.
Mai Nyamande, avo vanotungamirira chikwata cheExalt Worship Group, vanoti vakapinda mune zvemimhanzi nechinangwa chokuda kudzidzisa voruzhinji kuti vazive kwavakabva uye vasazorase tsika dzavo.
Vanoti dambarefu ravo rokutanga iri rine dzidziso yokuti voruzhinji kana vazoita mari vasazoshanduke, vasatange kudadira vamwe kana kusiya kunamata, sezvo Mwari varivo vanenge vavapa makomborero, asi kuti vazvininipise.
“Mari yakanaka, hapana munhu asingaidi, asi mari inoshandura vanhu vazhinji, mari ine chitema.
“Saka ini ndiri kupa dzidziso kuti munhu usashandurwe nemari, usarase unhu hwako nokuda kwemari uye usarega kunamata nokuda kwemari nokuti mangwana hauzivi kuti uchazovei.
“Vanhu ngatidzidze kuzvininipisa pane zvose zvatinoita, uye ngatitungamidze Mwari pazvinhu zvose zvatinoita,” vanodaro Mai Nyamande.
Kubva vatanga zvemimhanzi, Mai Nyamande vari kutenderera nyika yose vachiimba kumakereke akasiyana-siyana, vachiparidza vhangeri rekutendeutsa vanhu nekupa chenjedzo kune vechidiki kuti vafuratire zvinodhaka.
Vanoti kushanda kwavakaita naTocky Vibes pakambo “Waita Mari” kwakabatsira zvikuru kuti shoko ravaida kudzidzisa risvike kuvanhu.
“Ndakashanda zvakanaka naTocky, ende zvakabatsira kuti shoko randaida kuparidza kune vechidiki risvike, nokuti vechidiki vanoteerera Tocky.
“Saka ndine chivimbo chokuti shoko raJehovha rakasvika kwavari uye vachatendeuka,” vakadaro.
