Online Reporter
Moffat Mungazi
MURUME ane makore 68 okuberekwa wekuChikanga, kwaMutare — Harry Peter Mangani — akatongerwa kugara mujeri kwemakore gumi mushure mekuwanikwa aine mhosva yekubata chibharo muzukuru wake ane makore 28 okuzvarwa mugore ra2016.
Mutongi wedare reMutare Magistrates’ Court, Mai Sekai Chiwundura, vakatura mutongo uyu svondo rapera.
Mangani, uyo akaroora tete vemumhan’ari, akanga aramba mhosva iyi asi ndokuzorovererwa neumbowo hwakaburitswa mudare.
Dare rakaudzwa kuti Mangani akabata chibharo muzukuru wake apo vaigara vose kumba kwake.
Vachipa mutongo uyu, Mai Chiwundura, vakatsinhira kukura kwemhosva iyi vachiti kutyora mutemo unobatanidza mhuri kunowedzera kuipa kwemhosva iyi.
Vanoti zviito zvakadaro zvinosiya mukana mudiki-diki wekunzwirwa tsitsi, sezvo zvichidzikisira chiremerera chemunhu akabatwa chibharo pamwechete nezvisungo zvekubatana kwemhuri.
