Online Reporter
Kingstone Mapupu
MURUME wekuita hukopokopo hwekuba mari inodarika US$123 000, iyo yaifanirwa kuendeswa kune imwe kiriniki yakazvimirira muHarare kuburikidza nekubhadharwa kweMedical Aid, akatongerwa kugara mujeri kwemakore 12.
Mutauriri wemapurisa echikamu cheCriminal Investigations Department, Detective Inspector Rachel Muteweri, vanoti Tonderai Shayimana (30) akasungwa uye akawanikwa aine mhosva yekuba mari nehukopokopo.
Munyaya iyi, imwe kiriniki yakazvimirira yemuHarare yakaita chibvumirano nemakambani emaMedical Aid Societies akatsaukana zvaiita kuti vanhu vaibva kumaMedical Aid aya varapwe pakiriniki iyi ichizobhadharwa mari yaidiwa nekufamba kwenguva.
Shayimana anonzi, achishandisa huchenjeri hwake, akavavhura maakaundi ebhanga ake ayo aipinzwa mari nemaMedical Aid Societies aya pane kuti mari yacho iendeswe kukiriniki iyi.
Nekuona kuti mari yaisafamba zvakanaka, vapakiriniki iyi vakazosvitsa nyaya iyi kumapurisa zvikaonekwa kuti chikiribidi ichi chaiitwa nemusungwa uyu.
Shayimana akabva asungwa uye mukufeewa kwenyaya iyi zvakaonekwa kuti akanga atenga sitendi yekuvaka imba kuBudiriro muHarare uye ndokutengawo motokari yerudzi rweNissan NV200.
Det Insp Muteweri vanoti nekuda kwechikiribidi ichi, kiriniki iyi yakarasikirwa nemari inosvika ZW$15 362 415-00, ZiG95 409-74, neUSD$123 739-97.
Murume uyu akazomiswa mudare reHarare Magistrates’ Court pamberi pemutongi Marehwanazvo Gofa nguva pfupi yadarika ndokubatwa aine mhosva yekuba mari nehukopokopo.
Akapihwa mutongo wekugara mujeri kwemakore gumi nemaviri, ayo anoti mapfumbamwe ndeemhosva yehukopokopo uye matatu ndeekuvhiringidza mafambiro emari zvakanaka.
Motokari nesitendi zvakanga zvatengwa nemari iyi zvakatorwa zvikapihwa kukiriniki iyi.
Det Insp Muteweri vanoti hakuna mhosva inorova kunyange ikaparwa zvakavandika sei.
