Online Reporter
Kingstone Mapupu
MAKORORO matatu aiva ashungurudza vagari vekuKadoma nedzimwe nzvimbo dzakapoteredza nekuvabira midziyo yakasiyana akatongerwa kugara mujeri kwemakore anosvika 70 pamwe chete.
Vatatu ava, avo vakasungwa nemusi wa30 Kubvumbi nekuda kwemhosva dzekuba ndiMisheck Mtetwa (30), Lordshare Chimanya (29) naKudakwashe Mapfiravana (27).
Mutauriri wemapurisa kuchikamu chematikitivha cheCriminal Investigations Department (CID), Detective Inspector Rachel Muteweri, vanoti makororo matatu aya vaiva nemumwe wavo anonzi Jimmy Mtetwa, uyo asati abatwa, apo vaienda vachinoba munzvimbo dzakasiyana kuKadoma.
“Makororo aya aifamba achiba akapakata mapanga, matemo nemasimbi. Pakutanga, vakasvika pane imwe tuckshop ndokuwana muridzi wepo aripo ndokupwanya gonhi vakabva vaba mari,” vanodaro Det Insp Muteweri.
Vanoti makororo aya akaenderera mberi ndokunosvika pane imwe imba uko akanopwanya gonhi ndokunopinda akaba mari, nhare, laptop, makiyi emotokari nemimwe midziyo.
“Mukuba kwavaiita uku, pane pamwe pavakatora mari inokwana US$1 000, nhare nezvimwe nemusi wa30 Kubvumbi gore rino ra2026. Mapurisa eCID muKadoma vakazowana runyerekupe rwekuti makororo aya vainge vachiba vakabva vamhanya ndokunosunga vatatu ava,” vanodaro Det Insp Muteweri.
Vanoti pakasungwa makororo aya, kwakawanikwa zvinhu zvinosanganisira malaptop maviri, pfuti yerudzi rwePellet gun nenhare dzakawanda.
“Zvichitevera kusungwa kwemakororo matatu aya vakazoendeswa kudare reKadoma Regional Court pamberi pemutongi Nicholas Mupeiwa nemusi wa17 Nyamavhuvhu gore rino. Misheck Mtetwa akabatwa nemhosva akapihwa chirango chekugara mujeri kwemakore 30, Lordshare Chimanya naKudakwashe Mapfiravana mumwe nemumwe wavo akapihwa makore 20 ekugara mujeri,” vanodaro Det Insp Muteweri.
Muchuchisi munyaya iyi aiva Philip Urayai.
“Zvakadai, mapurisa eZimbabwe Republic Police (ZRP) vari kukumbira kuruzhinji kuti vawaniswe mashoko anoita kuti vagone kusunga Jimmy Mtetwa nekuda kwemhosva dzimwechete idzi dzekuba aine chikwata chevakasungwa ava,” vanodaro Det Insp Muteweri.
