admin
Abel Ndooka
MUIMBI weAfro-jazz Tongai Gwaze – uyo vazhinji vanoziva saGreat Man – anoti mamwe mapuromota nevamwe vari muindasitiri yemimhanzi vanotarisira vaimbi vakaremara mitezo pasi zvisinei nekuti vanenge vaine zvipo zvakakomba.
Vanhu vazhinji vakatanga kuziva nezvaGreatman zvichitevera kambo kake kaakaita naSuluman Chimbetu kanonzi “Pandakazvarwa” ako kanotaura zvekukura kwake achirarama nehurema.
Greatman akazvarwa ane chirwere chemyopathy icho chinomuitisa kuti agare ari pawiricheya sezvo asingakwanise kushandisa nhengo dzemuviri wake dzakasiyana kusanganisira makumbo uye mawoko sezvo akazvarwa akawoma mitezo.
Muhurukuro neKwayedza, Greatman — uyo anotungamira chikwata cheGreat Generations — anoti anoshungurudzika nekutarisirwa pasi kwaanoitwa nemamwe mapuromota nevaimbi.
“Zvinhu zvinondishungurudza kuona vamwe vaimbi uye mapuromota vachinditarisira pasi nekuti vanoti Great Man haagone kuita shoo ari ega.
“Asi mhanzi iri mandiri uye ini ndakazvipira kushanda, hapana chinondidzosera shure. Mhanzi ndiyo yakandirera kuti ndisvike pano uye ndicharwa kuti zita rangu risvike kure,” anodaro Greatman.
Greatman akakurira kuMhangura uko kwaakatanga kuita zvemimhanzi.
Anoti achikura kuMhangura, vanhu vemunzvimbo iyi vaimutsigira zvakanyanya kuti asimukire munyaya dzezvemimhanzi.
“Vanhu vemuMhangura vakanditsigira zvikuru nekuti vaiziva zvandiri uye vaiziva kuti mhanzi ndinoida zvakanyanya.
“Asi, chinhu chimwechete chaindidzorera shure inyaya yekuti mastudhiyo ekuMhangura ainge akasarira saka aisanyanyobika mhanzi yakanaka yandaida,” anodaro Greatman.
Dzimwe nziyo dzemuimbi uyu dzinosanganisira Gegede naCheziya.
Online Reporter