Kingstone Mapupu
MAPURISA eZimbabwe Republic Police (ZRP) ekuDarwendale, akazivisa nezvekusungwa kwemurume wemakore 41 okuberekwa, uyo ari kunzi aive anetsa nekuba mbudzi nehuku munzvimbo iyi.
Jackson Milanzi (41), wekuGretton Extension Farm, kuDarwendale, akasungwa nguva pfupi yadarika nemhosva yokuba mbudzi achishandisa musungo nomusi wa29 Gunyana 2026.
Zvinonzi mapurisa akawana runyerekupe rwokuti murume uyu aitengesa nyama yembudzi yaainge akaisa mumugomo papurazi reMaryland, kuDarwendale, ndokumuteverera kusvikira vamubata, ndokumusunga.
Mutauriri wemapurisa mudunhu reMashonaland West, Inspector Ian Kohwera, vanoti Milanzi paakabvunzwa nemapurisa akabvuma kuti ainge auraya mbudzi iyi musango remapuranga, achibva atungamirira mapurisa kunzvimbo yaakanage aurayira chipfuyo ichi.
“Mapurisa paakaenda naye panzvimbo iyi, akawana mbabvu dzembudzi, musoro, dehwe, mazondo mana embudzi iyi newaya yemusungo yaakange ashandisa pakubata mbudzi iyi. Mukufeya kwemapurisa, zvakabuda pachena kuti mbudzi iyi yaiva yaEmmanuel Nkurunzira (80), wepapurazi reGretton,” vanodaro Insp Kohwera.
Mbudzi iyi inonzi yaiva yabiwa kumafuro kwayakanga iri nedzimwe. Mukufambira mberi nekufeewa kwenyaya iyi, zvakabuda pachena kuti murume uyu akanga aba zvakare huku dzerudzi rwemabroiler sere paMunhondo Primary School munzvimbo imwe chete iyi mumwedzi waChikunguru, ndokunodzitengesa kupurazi reMuhacha, kwakare kuDarwendale.
Murume uyu anonzi achaendeswa kumatare edzimhosva nokuda kwemhosva mbiri dzaari kupomerwa dzekuba zvipfuyo.
“Zvakadai, mapurisa ari kukurudzira varimi vose mudunhu reMashonaland West kuvharira zvipfuyo zvavo mumatanga nguva dzeusiku uye kuona kuti zvinochengetedzwa nguva dzose pamisha zvose nekumafuro. Zvipfuyo zvinofanirwa kuverengwa zuva roga roga kuitira kuona kana paine zvarasika kana kubiwa,” vanodaro Insp Kohwera.
Vanoti zvipfuyo hazvifanirwi kusiiwa zvoga kumafuro sezvo zvichipa mikana kumakororo pakuzviba.
“Nguva dzeusiku ngatitarisei zvipfuyo zvedu, tozviverenga pakuzvivharira paye. Kune vane nzvimbo, ngatirimewo mafuro akakomberedzwa newaya. Kune michina yechizvinozvino inoshandisa masaisai inonzi matracker, iyo inoita kuti varimi vaone kune zvipfuyo zvavo nguva dzose, kunyangwe vari mumba kana kunzvimbo dziri kure,” vanodaro Insp Kohwera.
Vakazotenda voruzhinji nekupa kwavo mashoko kumapurisa nguva dzose, izvo zvinoita kuti makororo asungwe.
