Online Reporter
Ngakhumbula imithetho emibili phakathi kwelitshumi esebhayibhilini othi “ungatshontshi”, lothi “hlonipha uyihlo lonyoko ukuze insuku zakho zande ezweni.”
UDanisile wayekhuzwa njalonje ngabazali bakhe kodwa wakhetha ukubhada indlebe ngengcino yenyosi zegonde wangalaleli muntu.
Abafundisi bamabandla atshiyeneyo babehlala benxuswa ukuthi bazofaka imithandazo kodwa kazange ayidele imikhuba yakhe emibi.
Wayetshontsha inkomo zabantu egqekeza lezitolo zabantu, isimanga yikuthi wayethi loba angabanjwa abotshwe, ngemva kwensukwana abonakale esezihambela esephumile.
Uzwe laye esegiya eklamasa eqolotsha okwenkonyane esuthi uchago lwensengwakazi elele isidla ikhaba emasimini abantu ethi yena unguDani Dani, obophisa yena uzichithela isikhathi ngoba yena elabameli.
UDanisile wayengatshontshi inkomo eyodwa kodwa wayethatha umhlambi wonke. Wayengatshontshi lapha kuphela kodwa lakweleBotswana wayeseze eselabafana bakhe ayebathuma, kodwa isintu sithi indwangu iyalukhutha ugatsha kwelinye ilanga.
Lafika eliyisithutha nanko abadala babuye bathi akuqili lazikhotha emhlane wathi esemsebenzini yakhe emibi wadutshulwa wafa ngamapholisa.
Ngelanga lomngcwabo kwaphakama izakhamizi kumagumbi amane befuna ukuzobona ukuthi ngempela lumgulukudu usuhambile. Umfundisi uthe esetshumayela esithi uDani wayelungile ngoba kulesitsho esithi kungakhulunywa kubi ngasebefile siyabavalela indlela wasukuma uyise wathi:
“Uxolo Mfundisi ukuphazamisa intshumayelo yakho kodwa ngithi ngiphawule ngithi indodana yami ingidanisile njengebizo layo, ubelihlongandlebe engalaleli ngiphenduke inhlekisa ngenxa yayo. Ngiyabonga ukuthi ufe engatshiyanga nhlanyelo kulumhlaba ngoba bekungenzeka udiwo lufuze imbiza. Ngicela ufake umkhuleko siyechithekela ngekhaya.”
Kwakungamazwi omzali aveza ubuhlungu ayephakathi kwabo ngendlela indodana yakhe eyayiziphatha ngayo emphakathini.
Ayixabene.
