Online Reporter
Fungai Lupande
VAMWE vanhu vaviri vakaurayiwa zvakare nemusi weMuvhuro manheru svondo rino mubhuku raBhosha kunzvimbo yeMagaya, kuGuruve, izvo zviri kuita kuti veruzhinji mudunhu iri vagare vachitya zvakanyanya.
Vakaurayiwa ava mudzimai nemwanasikana wake aiita Form 3.
Mumwe mwana wemhuri iyi akapona neburi retsono mushure mekuhwanda pasi pemubhedha.
Izvi zvabva zvaiita kuti huwandu hwevanhu vaurayiwa kusvika parizvino husvike gumi nevaviri.
Mutauriri wemapurisa kudunhu reMashonaland Central, Inspector Milton Mundembe, vanotsinhira nyaya iyi vachiti iri kuferefetwa uye zvakawanda zvichaziviswa nekufamba kwenguva.
Mapurisa ari kutsvaga Anymore Zvitsva (32 uyo ari kufungidzirwa kuti ndiye ari kuita humhondi uhu achishanda nechikwata chake.
Kuurayiwa kwevanhu mudunhu iri kwakatanga munaGumiguru.
Humhondi uhu, uho huri kuitwa munguva dzemanheru, huri kumanikidzira mhuri dzakawanda dzemudunhu iri kusiya misha yavo uye vorara vakaita zvikwata kune dzimwe dzimba dzakasanangurwa.
