adminDZIMWE nyanzvi dzezvechivanhu dzinoti zvinokwanisika kuti munhukadzi kana kuti munhurume ashinhwe naye pabonde nechikwambo asi iye asingazive.
Izvi zvinotevera nyaya yemadzimai matatu ekuEpworth, ayo anoti aiitwa vakadzi nezvikwambo pamadiro kwemakore akawanda.
VaJonathan Shonhiwa (49) kana kuti Sekuru Mupamombe vekuChiredzi vanoti zvikwambo mishonga yekuromba yakaipisisa.
“Zvikwambo zvinouya zviine mufananidzo wemunhu wekuziva kana kuti zviri zvivanhu zvipfupi-pfupi zvotoshinha newe. Izvi zvinowanzoitwa nehama dzepedyo nekuda kwenyaya yekutsvaga upfumi,” vanodaro.
“Zvikwambo zvakadai zvinounza rushambwa kune vanhukadzi vazvinoshinha navo uye zvinokonzera kuti varambwe nevarume kana kusviba moyo zvekufuratidzwa kuti munhukadzi asade varume.”
Mashoko avo anotsinhirwa nemukuru wesangano reZimbabwe Traditional Healers Association (Zinatha), VaGeorge Kandiyero, vachiti mishonga yakadai haina kunaka.
“Zvikwambo zvakadai ndizvo zvatinoti zvakare ‘varume vemumweya yetsvina’.
“Zvinoitwa nevanhu vanoromba mishonga seyekuda kupfuma uye zvakawanda zvacho zvinenge zvichida kushinha nevanhukadzi.
“Zvinowanzouya kuhope zviine mumufananidzo wemunhu wepedyo, wekuziva,” vanodaro VaKandiyero.
Rimwe godobori, VaJohn Chikanga (55) avo vanozivikanwa saSekuru Gava vekuHurungwe, vanoti vanhukadzi vanoshinha nezvikwambo kana vachinge vari muwanano havana shungu nevarume vavo sezvo vanenge vakasvibiswa moyo.
Online Reporter