Online Reporter
George Maponga
MITUMBI mitatu yevarume avo vanofungidzirwa kuti vaivhima mhuka dzesango zvisiri pamutemo yakawanikwa muLake Mutirikwi mushure mekunge chikepe chavo, icho vakagadzira voga, chanyura mumvura nekuda kwedutu remhepo rakasimba.
Mutumbi waRangarirai Kovo wekumaruwa eChikwanda, Robert Ndava wekuMushandike Resettlement newaNorman Rangarirai wekuStop Over yakawanikwa nechikwata chinosanganisira veukama mushure mekunge vapedza mazuva ane chitsama vachivatsvaga.
Vatatu ava vakafa apo chikepe chavo chakanyura nekuda kwedutu remhepo rakasimba.
Pakatanga kutsvagwa vatatu ava, mitumbi yavo haina kuwanikwa kunyangwe vechikamu chemapurisa chePolice Sub-aqua Unit vaibatsira mukutsvaga uku kusvikira vakazoregedza.
Mutauriri wemapurisa kuMasvingo, Inspector Kudakwashe Dhewa, vanoti mitumbi yevatatu ava yakazowanikwa neveukama.
“Mitumbi miviri yakawanikwa yakayangarara pamusoro pemvura apo mutumbi wekupedzisira wakaonekwa uri pedyo nemahombekombe neveukama avo vakaramba vachitsvaga. Mitumbi yose iyi yakange yatowora zvakanyanya,” vanodaro Insp Dhewa.
Vanoti kusiyana nemashoko akange ambobuda pakutanga, zvinotaridza kuti vatatu ava vakange vasina chinangwa chekubata hove zvisiri pamutemo muLake Mutirikwi.
Insp Dhewa vanoti pane fungidziro huru yekuti vatatu ava vaivhima mhuka zvisiri pamutemo uye panguva yavakazonyura iyi vaibva kuKyle Recreational Park kunovhima munguva dzemanheru.
“Imbwa yakafa yakawanikwawo iri muchikepe ichi. Vashakabvu ava zvakare vaive nemidziyo yemwenje inoshandiswa mukuvheneka zvakanyanya munguva dzehusiku zvinotaridza kuti vanogona kunge vaivhima mhuka zvisiri pamutemo kuKyle Recreational Park,” vanodaro Insp Dhewa.
