‘Mnikeni imali yakhe uSawu’

Bongani Ndlovu

UMKHUBA weziphathamandla zeHighlanders, wokungabhadali imali zabantu kukhanya uyakhula.
Lokhu sekucunule inengi labalandeli bayo, kulandela udaba lukamqeqetshi u-Agent Sawu osehambise iqembu kumagqwetha ecela ukuphiwa imali yakhe ye-signing on fees leholo, efika i-US$6 000.

Abalandeli sebeveze ulaka lokudana okukhulu. Bangene kunkundla zokuxhumana lapho abavumelane ukuthi iBosso kumele ihloniphe izibopho zayo zesivumelwano eyasenza loSawu.

Lolu daba luvuse inkulumo ezinengi ekhasini leChronicle kuFacebook, lapho abalandeli ababuze khona ngendlela okuqhutshwa ngayo iqembu, izinqumo zomthetho lokuphathwa kwezimali.
Lanxa imizwa ibiphezulu, umqondo ohamba phambili ngowokuthi isivumelwano, nxa sesisayiniwe, kumele sihlonitshwe.

“Kumele aphiwe amalungelo akhe. Le yibhizimusi,” kubhale uNtandoyenkosi Mlilo, umbono ovunywe ngabanengi.
Abanye baveze ukumangala ngendlela iqembu eliphatha ngayo udaba lolu.

“Yibaphi abakhokheli beHighlanders abavumela ukuthi kwephulwe isivumelwano kanje?” kubuze uEphraim Makara, ikanti omunye umlandeli uthe ubakhokheli beBosso basebenza “njengesitolo sezithelo”.

Abanye abalandeli baxwayise ukuthi ingxabano ezinjengalezi zilimaza isithunzi seqembu njalo zibalekise abangaba ngabaxhasi ngemali.
Kubikwa sekukanengi iHighlanders ivame ukuzithola isiphakathi kwengxabano eziphathelane lezikwelede.
Kube lombuzo wokuthi kungani kulezikwelede lanxa kwabikwa ukuthi iqembu lathola uncedo lwemali.

“Kuyakhathaza ukuthi kukhulunywe ngezikwelede kodwa iqembu lathola imali,” kubhale uVukani Chris Mhlanga.
Isivumelwano sikaSawu kubikwa ukuba besizaphela mhlaka 31 Mpalakazi lonyaka.
Loba ingxenye yabalandeli ivumelane ukuthi uSawu ulelungelo lokufuna imali yakhe, abanye kabazange bamsekele kulokhu.

“Akazange alethe impumela enhle eqenjini, kutsho omunye wabo.
Abanye babuze ukuthi kungani uSawu, owayengumdlali weZimbabwe Saints leDynamos, waqhatshwa yiHighlanders.