Online Reporter
Solomon Bhumu
MOTO unotyisa wakapararira paBrooms Garage kuRiverside kwaMutare, ukaparadza motokari dzinosvika makumi matatu, imwe neimwe inokosha zviuru nezviuru zvemadhora nemusi weChipiri svondo rino.
Garaji iri, iro rinogadzirwa motokari dzemhando yeMercedes-Benz, rakaputirwa nemarimi emoto uyo unonzi wakatanga apo vashandi vekanzuru yeguta reMutare vaipisa marara.
Muridzi wegaraji iri, VaAnesu Akim, avo vaiderera vachitaridza kuremerwa zvakanyanya, vakasara vasina remuromo mushure mekurasikirwa kukuru uku.
VaAkim havana kana kukwanisa kuwana mashoko ekutaura panguva iyi nekuda kwekurasikirwa uku izvo zvairatidza kuti vakange vagurwa kunorira.
Izvi zvakaita kuti vatori venhau vabve panzvimbo iyi vasiri kuziva kuti motokari idzi dzaive nemitero yeinishuwarenzi (comprehensive insurance) here uye kuti dzaikosha mari dzese.
Mumwe wevashandi vepagaraji iri, VaNomore Simango, vanoti vakaedza nepavanogona napo kudzima moto uyu asi wakazovakurira.
Mutauriri wemapurisa mudunhu reManicaland, Assistant Inspector Wiseman Chinyoka, vanoti ongororo yenyaya iyi iri kuenderera mberi.
“Nyaya yekutsva kwemotokari nemoto yakaitika zvedi uye ongororo yekuona kuti chii chaizvo chakaitika iri kuitwa. Tinoyambirawo veruzhinji kuti vasavese moto kana vasingazokwanisa kuudzima kuitira kudzivirira kurasikirwa kwevanhu nemidziyo nenzira dzakadai,” vanodaro.
