Online Reporter
Arron Nyamayaro
VAMWE vanhu vaive parwendo rwekunoviga hama yavo kumusha vakamhanyidzana kubvisa bhokisi raive nechitunha mumotokari inotakura vafi zvichitevera kubatira kwayakaita moto kuArdbennie, muHarare nemusi weMuvhuro svondo rino.
Vakaona izvi zvichiitika vanoti vanhu ava vakabatsirwa nevamwe vedzimotokari vaidarika.
Bhokisi raive nechitunha iri rakazoiswa muchechi yeChurch of the Latter Days Saints, iyo yaive pedyo nepakabatira motokari iyi moto.
Motokari iyi, iyo inove yeVadzidzi vaJeso Funeral Parlour, yakatsva zvekuita dota.
Yaityairwa naStuart Muyewa (26) uye chiitiko ichi chakatora nzvimbo mumugwagwa waBosh Off Drive, kuArdbennie.
Vanhu vaive vawirwa nerufu ava vanonzi vaienda kumusha kwemushakabvu kuti vanomuviga.
Mumwe akaona izvi zvichiitika anoti: “Takaona motokari iyi ichibatira moto uye vanhu vaive vawirwa nenhamo, kusanganisira vaive mune dzimwe motokari vakamira ndokumhanya kunobvisa bhokisi raive nechitunha.”
Mumwewo akaona izvi zvichiitika, anoti veFire Brigade vakazosvika mushure mekunge motokari yaive yakatakura chitunha iyi yatotsva yose zvekuita dota.
“Mufi ari kuramba kuenda kumusha uyo. Muendesei kuZororo kana kuMbudzi kusina mitauro mizhinji,” anodaro mumwe akaona njodzi iyi ichiitika.
