adminNDAUWE ndauwe! Ngatibvunze thongo redu rekupona iyo Chikore, Hlabiso, Tonhorai neChecheche. Ndinogonda zviro zvakhona zvichakati chechetee kunga hope yedede amuna woye.
Nyamashi uno tinode kumbophanda ngegama rinoti mubvandirimwo. Mubvandirimwo mwana unobarwa ndimai akwe kumusha kwaanonga aroorwa, teibhuye kuti anonga aroorwa ane mimba asi isiri yemwamuna uyu waatizira nemimba iyi.
Ndinogonda chazwika chendinoreketacho. Izvi zviro zvinoitika yaamho pakudanana, nangokudaro mukudananamwo, mune utyongondo hwakawanda yaamho hunoite kuti zviro zvibude zvaane matsoryoryo kudaro.
Ngatimboti chauya masikati charambe ndima kwaNdimeyo.
Chauya madeikoni charambe hope iyo kweduyo kwaHonde. Amweni anodanana, kuzoti mimba iya yamera, uyu mwamuna waakuti yoowe andichakudi, saka chewaida apa manhi badzi ere. Manhi tingati arusiro rudo akadi asi kuti manhi anogwinyise muemo werudo.
Mukadziwo unokone kutiwo awone mimba yaapo, oti andichadi. Dangwani unonga aone kuti zvaaikarira kune muisa uno, apana. Umweni unonga eitsvaka hake rugare rwemare, ozoone kuti muisa uyu umaari kamundi emene, haana kana nepeni riya raiya neburi nguwa yeRhodesia.
Ndakariona peniro ndikatotenga nani masiwiti ndiro. Amweni acho ndiwo endaizoona akasungirwe ndumure muhuro, andichazii hangu kuti zvaikumuche kutinyi zvadai zviya.
Zvawanda kudaro, akuru anoti yakore muto, saka ndikwo kusiirane mutindi kunga mikono yaambane padhibhi rekwaMajejeje. Mukabvunza anaGodfrey Majeje acho anochiziya chemikonoyo.
Umweni musikana unonga eide mare yemwamuna uyu asi akanyase kuronzerwa kuti kumhatsoyo ariyo maikuru nendumure dzinorye mukonde wesadza siku nesikati iyo kubaniyo kwaRimbi. Kuzoti mimba iya yaguma kudaro, uyu nyakuashidzwe mimba wotoruke zano rakwe mugoni. Nangokudaro amweni asikana akangwarangwara unobva ati apa wabuda apa wabuda, kubva wotobuda naro jaha muthathanyara waro, baba anhiya nawo kwaakutoroora.
Abhuirane zvaareketerana apapo, masoko adakadza erudo, ndiwo thwathwa koogarisane mumhatso.
Zvadai toti makorokoto, rudo rwasunga paiya pode kuphutunuka kunga chipombo chendande. Asi tinode kudarika teiti tine urombo kune anonga adhonzeswe dzanzu risiri rawo kubeni asikazi kubhuirwe gwinyiso.
Pane angade kureketa naPenyai ngatidhibhane pa0772, 332 264, 0712 948 959.
Online Reporter