adminFortunate Gora ari kuCHINHOYI
MUDZIDZI wepaChinhoyi University of Technology (CUT) ava kufondoka pasina muripo zvichitevera kubatwa kwaakaitwa nemhosva yekubira mumwe waanodzidza naye midziyo nezvimwe zvinhu zvinokosha $950.
Fredrick Tawanda Muzvidzwa (21) – uyo anogara panhamba 1133 Grenary Park, kuHarare asi achidzidza kuCUT – akasarudza kunoshanda pasina mubhadharo pane kuti avharirwe mujeri apo akabvunzwa zvaaida namutongi weChinhoyi Magistrate Court Christine Nyandoro mushure mekubatwa nemhosva yekuba.
Muzvidzwa achapihwa mutongo wake uzere unotsanangura paachazenge achishanda nenguva dzacho mumazuva mashoma anotevera.
Muchuchusi Texas Manditsvara akaudza dare kuti musi wa23 Mbudzi gore rapera, Muzvidzwa akabva kuCUT aina Takura Kure (21) anogara panhamba 24 Lienchfield Lane, kuBorrowdale, muHarare vachienda kwaTM yekuChinhoyi.
Vasvika paTM, Kure akakumbira Muzvidzwa kuti amuchengetere mabhegi ake maviri iye achipinda muchitoro kunotenga chikafu.
Kure pakadzoka, akasvikowana rimwe bhegi rake hombe rasara roga, Muzvidzwa aenda nebhegi rakanga riine laptop, mbatya neArt set.
Akabva akumbira vakuru vemuchitoro ichi kuti vaongorore CCTV yavo kuti agoziva akange atora bhegi rake apo akaona matorero akaita Muzvidzwa bhegi rake nematiziro aakaita.
Kure akabva anomhan’ara nyaya iyi kumapurisa zvikaita kuti Muzvidzwa atsvagwe ndokusungwa.
Online Reporter