Online Reporter
Kingstone Mapupu
MUDZIMAI wekwaSabhuku Huchu, kuMvuma akasungwa nemhosva yekurova zvakaipisisa mwanasikana wake ane makore 15 okuberekwa achimupomera kuti akanga aba miguri yechibage mumunda memuvakidzani wavo.
Mutauriri wemapurisa kudunhu reMidlands, Inspector Emmanuel Mahoko, vanoti nyaya iyi yakaitika nemusi wa21 Kukadzi.
“Amai ava, Primrose Kwangware (35), vanonzi vakatora shamu ndokurova mwanasikana wavo uyu muviri wese zvakaomarara apo muvakidzani wechidzimai wemhuri iyi akanga avataurira kuti aiva aba miguri yechibage chake chinyoro,” vanodaro Insp Mahoko.
Vanoti mwanasikana uyu akazotiza pamba nekuda kwekurohwa uku apo akazosangana nemumwewo munhu akazomubatsira kumuendesa kumapurisa uko nyaya iyi yakanomhan’arwa.
“Mapurisa vakabva vatanga kufeya nyaya iyi zvakazoita kuti vasunge amai vemwana uyu. Mwana uyu akazoendeswa kuchipatara uko ari kurapwa,” vanodaro.
Insp Mahoko vanoti kune nyaya dzakawanda mudunhu ravo dzevana vari kukuvadzwa vachirohwa nevabereki kana vamwe vachengeti vavo.
“Izvozvi tine nyaya yemwana anonzi akapondwa naamainini mudzimai wababa vake mudiki kudunhu raMambo Sahi kuGokwe. Tinokurudzira kuchengetedzwa kwevana zvakanaka mumisha mavanogara,” vanodaro Insp Mahoko.
