daniel chigunwe
Fidelis Chavarike
MUKADZI ane makore 37 okuberekwa wekuArea 16 kuDangamvura, kwaMutare akamiswa mudare reko achipomerwa mhosva yekuwanikwa aine mushonga wechikosoro webroncleer pamwe neCrystal methamphetamine iyo inozivikanwa zvekare seguka kana kuti mutoriro.
Pedzisai Sheena Sangaza akamiswa pamberi pemutongi VaTendai Mahwe vedare reMutare Magistrates Court achipomerwa mhosva yekutyora chikamu chemutemo weSection 157(1)(a) of the Criminal Law (Codification and Reform) Act (Chapter 09:23) and Section 29(1a) of the Medicines and Allied Substances Control Act (Chapter 15:03).
Muchuchisi, Mai Sharon Mlambo, vakaudza dare kuti nemusi wa24 Ndira gore rino, Sangaza akabatwa aine broncleer pamwe chete nemethamphetamine kumba kwake kuDangamvura.
“Mabhodhoro anosvika 55.22g emethamphetamine nemabhodhoro e7x100ml ebroncleer cough syrup ane ‘codeine’, inova mishonga isina kunyoreswa muZimbabwe, akatorwa kumba kwake ndokuendeswa kumahofisi eCID Drugs and Narcotics Manicaland kwaMutare,” vanodaro.
Muzvare Mlambo vanoenderera mberi vachiti Sangaza akapa mashoko emanyepo kumatikitivha achiti anonzi Sheena Mugwagwa.
Sangaza achadzoka kudare nemusi wa3 Chikunguru apo ari kutongwa achibva kunze zvichitevera kubvisa bhero kwaakaita.
Online Reporter