Online Reporter
Muchaneta Chimuka
MURUME wekuChitungwiza akazvuzvurudzirwa kudare nemhosva yekuruma munin’ina wake paruoko zvakaita kuti akuvare apo vairwira US$30 yaive yatumirwa naamai vavo.
Obrient Chirungwa (25) akaruma Dylan Tembo (22) vachirwira mari iyi izvo zvakazoona achidhonzerwa kuChitungwiza Magistrates Court.
Mutongi wedare iri, VaAlois Midzi, vakapa Chirungwa chirango chekubvisa faindi yeUS$150 kana kuti kugara mujeri kwemwedzi mitatu nechitsidzo chekuti haafaniri kupara imwe mhosva yakadai makore mashanu asati adarika.
Muchuchisi, VaMunyaradzi Karimazondo, vakaudza dare kuti nomusi wa2 Kubvumbi gore rino, vaviri ava vainge vari pamba apo amai vavo vakatumira US$30 panhare yaTembo kuti azoipa kune mukoma wake.
Tembo akabva amupa US$20 bedzi pachibva pamuka kusawirirana apo Chirungwa akanga ava kushaya zvekare US$20 yaainge apihwa.
Akabva ashevedza mumwe muvakidzani kuti abatsire kugadzirisa nyaya iyi asi zvakashaya basa nekuti paakangofuratira achidzokera kumba kwake, Chirungwa akabva aruma ruoko rwekuruboshwe rwaTembo zvakaita kuti akuvare achibva aendeswa kuchipatara kunorapwa.
Magwaro ekwachiremba akamurapa akabudiswa mudare seumbowo.
“Patakanetsana nenhau yemari, Obrient akauya nemumwe murume waakati aive mupurisa kuti azotigadzirisa asi ndakashamisika pakangoenda murume iyeye akabva anditevera ndokundiruma ruoko rwangu rwekuruboshwe ndichibva ndakuvara,” anodaro Tembo.
Online Reporter