Online Reporter
Kingstone Mapupu
MUKOMANA ane makore 16 okuberekwa wekwaKutama, kwaZvimba akasungwa nemhosva yekubata chibharo ambuya vane makore 85 ekuberekwa.
Mukomana uyu (zita rake tinorichengetedza sezvo asati abva zera) anonzi akapara mhosva iyi nemusi wa17 Nyamavhuvhu nenguva dza5 zuva rodoka mumusha waSabhuku Gomwe kudunhu raMambo Zvimba.
Mutauriri wemapurisa kuMashonaland West, Inspector Ian Kohwera, vanoti mukomana uyu akaenda kumba kwaambuya ava achitengesa hanyanisi ndokunotaura navo kuti vatengeserane bhanduru nekuchinjanisa nechibage chinorema makgs mashanu, vachiita mutengano wegudo.
“Apo mbuya ava vaiva vachigadzira chibage chavo kuti vachinjanise nehanyanisi dzaitengeswa nemukomana uyu, akabva avadhonzera muimba yavo ndokunovapunzira pasi achibva avabata chibharo kamwe chete,” vanodaro Insp Kohwera.
Vanoti ambuya ava vakazozivisa nyaya iyi kumwanakomana wavo uyo akazomhanya kunomhan’ara kumapurisa eZRP Kutama.
Mukomana uyu akabva asungwa pakarepo.
“Semapurisa, tinokurudzira veruzhinji kuti varege kusiya vanhu vakwegura vari voga pamisha, hazvina mhosva varume kana kuti madzimai kuitira kudzivirira matambudziko akadai aya nekuti kune vamwe vanhu vanoda kutora mikana yekuita zvakaipa kwavari,” vanodaro Insp Kohwera.
Vanoti pane nyaya dzakawanda dzinoitika dzekubirwa kwevanhu vakwegura vari voga uye vamwewo vachitsvira mudzimba vasiya moto uchibvira nemamwewo matambudziko akasiyana.
“Vakwegura musimboti wedu saka vanhu vanoda kubatwa zvakanaka kwete kuvashungurudza,” vanodaro Insp Kohwera.
