admin
Gamuchirai Muzanenhamu —
GURUKOTA rinoona nezvevashandi nekubatsirwa kwevanoshaya, Cde Prisca Mupfumira, vanoti zvakakosha kuti vanhukadzi vawaniswe mikana yakaenzana nevanhurume yekudzidza kusvika kuzvidanho zvekumusoro-soro.
Vakataura mashoko aya neChishanu svondo rapera paWomen’s University in Africa (WUA) pakuparurwa kwechirongwa chichateverwa neyunivhesiti iyi mukusimudzira mabasa ayo kwemakore mana, cheTransformational Strategy 2016-2020.
“Akadarika mazuva aye ekuti dzidzo yepamusoro yainzi ndeyevanhu vashoma avo vanongosarudzwa kuti ndivo vanoenda kuyunivhesiti uye vachionekwa sevanonzi ndivo vane ruzivo bedzi,” vanodaro.
Cde Mupfumira vanorumbidza basa riri kuitwa neWUA, iyo inotungamirirwa namuzvinafundo Hope Sadza, mukusimudzira dzidzo yevanhukadzi.
Cde Mupfumira vanoti kuwaniswa kuri kuitwa dzidzo yepamusoro kuvanhukadzi kunoenderana nechirongwa chekuvandudza upfumi hwenyika, cheZim-Asset.
“Donzvo guru reWomen’s University in Africa kuwanisa mikana kuvanhukadzi kuti vakwanise kuzvimirira muupenyu hwavo vachizvishandira. Izvi zvinoenderana chaizvo nechirongwa cheZim-Asset, icho chinokurudzira kuenzaniswa kwemikana pakati pevanhukadzi nevanhurume munyaya dzeupfumi,” vanodaro.
Online Reporter