Online Reporter
Arron Nyamayaro
MUMWE mupurisa akarumwa nzeve yake yekurudyi ikadambuka mushure mekurwiswa uye kuzopambwa nemutyairi wekombi achibatsirana nakondakita wake kuRhodesville, muHarare nemusi weSvondo.
Constable Shadreck Jongwe (36) vakaendeswa kuchipatara cheParirenyatwa Hospital Group of Hospitals kunorapwa uye ndokuzoburitswa.
Shepherd Kazingizi (35) naTakudzwa Pachavo (29), avo vose vanogara kuRuwa, vanonzi vakapamba Const Jongwe ndokutiza navo vakananga kuEstelea vachibva muHarare Central Business District.
Const Jongwe, pamwechete naConst Chinhamo, vaive pabasa vachiona kufamba kwemotokari pamugwagwa apo vakamisa Kazingizi mushure mekunge atakurira vanhu panzvimbo isingatenderwe.
Kazingizi aityaira Toyota Hiace (ine nhamba dzinoti AGJ 9866) yeruvara rwuchena apo Const Jongwe vaida kuenda nekombi iyi paRoadport Police Post kuitira kuti mutyairi wayo abhadhare faindi.
Const Chinhamo vakasara vari panosangana migwagwa vachienderera mberi nebasa ravo.
Kazingizi akaramba kuterera zvaakange audzwa nemapurisa aya ndokutyaira kombi yake, Const Jongwe varimo mukati, ndokuenda nekumabvazuva ari mumugwagwa Robert Mugabe.
Panguva iyi, Pachavo akarova Const Jongwe nezvibhakera kakawanda.
Mumwe wevaviri ava akazoruma Const Jongwe nzeve yavo yekurudyi vasati vavasiya mumugwagwa Robert Mugabe, pedyo neRhodesville.
Kazingizi naPachavo vakazosungwa mushure mekunge mapurisa ashandisa motokari yaMelisa Manon’ore kuvaronda.
Mumwe kondakita wepachiteshi cheSimon Muzenda Bus Terminus, uyo akangoti anonzi Nyamudzanga, anotaridza kushushikana nekukanganiswa kunoitwa basa ravo nemhirizhonga yerudzi urwu.
“Ndine fungidziro yekuti pane zvavakange vanwa kana kutora,” anodaro Nyamudzanga. “Haufe wakahwinha kana ukatanga hondo nemapurisa. Maitiro avo anotaridza kushaya huchenjeri uye anotowedzera kuti hukama hwevabati vezvemutemo nevatyairi vemakombi husamire zvakanaka.”
