Online Reporter
Lovemore Kadzura
MURUME ane makore 22 okuberekwa, uyo akagara mwedzi mina nemusikana ane makore 16 okuberekwa semudzimai wake, ozvidemba mushure mekusungwa pamwe nekuzvuzvurudzirwa kumatare nekuda kwemhosva iyi.
Nyasha Chuma wekuMagamba kwaRusape, akatora musikana uyu apo aive parwendo rwekushanyira vabereki vake kwaMutare ndokutanga kugara naye semudzimai wake.
Amai vemwana uyu vakazomhan’ara kumapurisa zvakaita kuti Chuma asungwe.
Musungwa uyu aive asina gweta rakamumirira apo akamiswa pamberi pemutongi Mai Barbra Mateko vedare reRusape Magistrates Court.
Akabvuma mhosva yake pasina kundandama.
Mai Mateko vakamutongera kufondoka kwemaawa 520 pasina muripo.
Muchuchisi Muzvare
Faith Mutukwa vakaudza dare kuti nekugara kwaakaita nemusikana asati abva zera, Chuma akatyora chikamu cheSection 70 (1)(a) chemutemo weCriminal Law (Codification and Reform) Act (Chapter 9:23).
Pasi pemutemo uyu, imhosva kuita bonde nemunhu ane makore ekuberekwa ari pasi pe18.
“Musi wa12 Chikumi, 2025, nenguva dza10am, kwaMutare, mumhan’ari akasangana nemusungwa, ndokumupfimba uye akabvuma kuti vapinde murudo,” vanodaro Muzvare Mutukwa.
Dare rakaudzwa kuti rimwe zuva munaGunyana 2025, musikana uyu aibva kwaanogara kwaTandi, kwaRusape achienda kwaMutare uko kunogara vabereki vake.
Paakasvika pachiteshi chemabhazi
cheVengere Bus Terminus maRusape, musikana uyu akabva asangana naChuma uyo aityaira motokari.
“Mumhan’ari akapinda mumotokari ndokubva vaenda vose kumba kwemusungwa.
“Pavakasvika, Chuma akabva abvisa mumhan’ari humhandara, uyo aiwirana nazvo. Kubva musi uyu, musungwa nemumhan’ari vakaita bonde kakawanda uye kunzvimbo dzakasiyana,” vanodaro Muzvare Mutukwa.
Gure iri rakazobuda pachena apo amai vemusikana uyu vakaziva nezvenyaya iyi zvakaita kuti vamhan’are kumapurisa, Chuma ndokusungwa.
Musikana uyu akanovhenekwa nanachiremba uye gwaro racho rakabuditswa mudare seumbowo.
“Musungwa zvaakaita hazvisi pamutemo,” vanodaro Muzvare Mutukwa.
