Online Reporter
Danisa Masuku
MURUME wekuBulawayo ane makore 43 okuberekwa akabatwa nemhosva yekuwanikwa aine kamafurashi zvisiri pamutemo uye nekuipfeka zvakare.
Qhubekani Mkhize (43) anogara kuNguboyenja, kuBulawayo akamiswa mudare reko pamberi pemutongi VaGolden Muyambo akatarisana nemhosva mbiri idzi pasi pechikamu cheSection 32(2) chemutemo weCriminal Law Codification and Reform Act.
Mukuzvidzivirira, Mkhize akaudza dare kuti: “Ndakawana kamafurashi iyi kuSouth Africa uko ndaishanda semurindi. Handina kuzviziva kuti imhosva. Ndakaramba ndichiipfeka nekuti handina kuziva kuti ndiri kutopara mhosva.
Muchuchisi Muzvare Sibusisiwe Sithole vakaudza dare kuti veruzhinji havakurudzirwe kupfeka kamafurashi.
“Vanhu vemunharaunda havakurudzirwe kupfeka kamafurashi nekuti kune vamwe vanonyepa kuti mapurisa uye vachipara mhosva dzekutsotsa vanhu.
“Hurumende inonamata kuti papihwe mutongo unoita kuti veruzhinji vasapfeke kamafurashi,” vanodaro.
Kutongwa kwenyaya iyi kwakapfuudzwa kumberi.
Muzvare Sithole vanoti nemusi wa25 Chivabvu gore rino nenguva dza3.30pm, matikitivha eCID Minerals, Flora and Fauna Unit vaiita chirongwa chinonzi ‘Iron Fist’ apo vakaenda kumugodhi weOswell Mine, Lot 12 Umguza, kunze kweguta reBulawayo.
Matikitivha aya akabva aona
Mkhize akapfeka kamafurashi ari pedyo negedhi repamugodhi uyu.
Vakaenda kwaari ndokubva vazvizivisa kuti vaiva vanaani uye ndokumuudza kuti avataridze umbowo hwekuti ane mvumo yekupfeka mutirauzi wekamafurashi.
Mkhize akakundikana kupa umbowo uhu akabva asungwa.
Kamafurashi iyi yakatorwa uye ichaburitswa mudare seumbowo.
