Online Reporter
Kingstone Mapupu
MURUME ane makore 25 okuberekwa wekwaSabhuku Mbombela kwaMambo Malisa kuSilobela, kuKwekwe akapondwa achiita zvekutemwa mumusoro nebhodhoro redoro nemumwe murume pabongozozo remubhawa.
Nyaya iyi yakaitika nguva pfupi yadarika panzvimbo yemabhizimisi yeCross Roads, kuSilobela.
Partson Ncube anonzi akatemwa mumusoro nebhodhoro redoro ndokubva azotakurwa kuendeswa kuchipatara cheSilobela District hospital uko akasvika achifa.
Ncube anonzi ainwa doro nevamwe vake paakazotemwa nebhodhoro iri nemumwe murume.
Vakafanobata chigaro chemutauriri wemapurisa kudunhu reMidlands, Assistant Inspector Mollidias Zivuku, vanoti Rasmos Mawere (27) wekwaSabhuku Urayayi kwaMambo Malisa kuSilobela ainwa doro paSpringvest Night Club kuCross Roads Business Centre apo akatanga kunetsana nemumwewo murume asina kuzivikanwa uyo ainwawo doro mubhawa iri.
“Mumwe murume ainwawo doro uyu aona kukakavadzana kwavo kwanyanya, akabva abuda mubhawa iri achitiza uye achidzingirirwa naMawere asi akabva atadza kumubata. Mawere akadzoka mubhawa umu achibva aenda kuna Partson Ncube aiva akamira pavharanda rebhawa iri ndokumutema kamwechete nebhodhoro mumusoro akabva apunzika ndokufenda,” vanodaro Asst Insp Zivuku.
Ncube akabva atakurwa kuendeswa kuchipatara cheSilobela District Hospital uko akasvika achifa achangotanga kubatsirwa.
“Mapurisa vakazotanga kutsvaga Mawere uyo akanga atizira kuNkayi uko vakanomubatira,” vanodaro Asst Insp Zivuku.
Vanoti senguva dzose, vanokurudzira veruzhinji kuti vasagadzirise nyaya dzinonetsa pakati pavo nekurwisana asi kuti vatsvage vayananisi vakadai semasabhuku, makanzura kana mapurisa.
Asst Insp Zivuku vanoti semapurisa vari kushungurudza zvakanyanya nekuwanda kuri kuita nyaya dzekupondana kwevanhu kuMidlands.
