Online Reporter
Kingstone Mapupu
MURUME wepaPlot 11 papurazi reChinyerere kuKaroi – Comfort Manyonga (30) – ari kutsvagwa nemapurisa nemhosva yekuponda baba vake, Bonface Manyonga (64) nekuda kwechikonzero chisati chazivikanwa.
Matikitivha echikamu cheCriminal Investigations Department (CID) ekuKaroi ari kukumbira kune veruzhinji vanoziva kuna Comfort kuti vataurire mapurisa ari pedyo navo.
Mutauriri wemapurisa kuMashonaland West, Inspector Ian Kohwera, vanoti Bonface akawanikwa akafa nemusi wa12 Chikumi aine maronda muviri wese.
“Nemusi uyu, Bonface Manyonga akabva kumba kwemudzimai wake mudiki nenguva dza0600 hours ndokuenda kufarm house uko kunogara mudzimai wake mukuru. Ari ikoko, akatanga kuchenesa imwe yedzimba dzake iyo aida kuisa fodya. Mutumbi waBonface Manyonga wakazoonekwa nevana vechikoro vaidarika wakazara ropa chinhambwe chinoita mamita matanhatu kubva pamugwagwa weHarare-Chirundu mupurazi rimwe chete iri nemusi wa12 Chikumi nenguva dza0900 hours, ,” vanodaro Insp Kohwera.
Vanoti nyaya iyi yakabva yamhan’arwa kumapurisa eKaroi Rural pamwe chete neCID.
Mapurisa akaona kuti mutumbi uyu waiva nemaronda akadzika akawanda kusanganisira mumusoro, muhapwa nepadumbu.
“Mutumbi wemurume uyu wakazotakurwa kuendeswa kumochari yechipatara cheKaroi District Hospital kunoongororwa nanachiremba. Zvakadai, tinokurudzira kuremekedzwa kweupenyu hwevanhu uyewo tinokumbira kuruzhinji vanoziva kuna Comfort Manyonga kuti vazivise chero mapurisa ari padyo navo sezvo ari kuda kubvunzurudzwa nekuda kwenyaya yemafiro ababa vake uyo akangoshaika pavakawanikwa vakapondwa,” vanodaro Insp Kohwera.
Vanoti kungonyangarika kwaComfort musi wakawanikwa baba vake vakapondwa kunotaridza kuti ane chekuita munyaya iyi.
