Online Reporter
Muchaneta Chimuka
MURUME ane makore 37 okuberekwa anogara kuGweru akasungwa nemapurisa nemhosva yekuponda mudzimai wake.
Mutauriri wemapurisa mudunhu reMidlands, Inspector Emmanuel Mahoko, vanoti murume uyu — Nhlalo Darlington Baloyi — akasungirwa kuShambrock Mine mumugwagwa Matobo kuLower Gweru nguva pfupi yadarika.
Vanoti mhosva yehumhondi iyi yakaitika kuMkoba 4 muGweru.
“Mapurisa akasunga Nhlalo Darlington Baloyi (37) anobva kuMkonto Village, kuZhombe uyo akanga ari kutsvagwa kubva musi waakapara mhosva iyi. Ari kupomerwa mhosva yekuponda mudzimai wake, Patricia Nyathi (32), uye vaviri ava vakanga vari kugara vese kubva munaZvita gore rapera,” vanodaro.
Vanoti Baloyi akasungwa mushure mekushambadzwa kwakaitwa nemapurisa mumapepanhau, pamadandemutande nekumwe kwakasiyana kuti vaiziva kwaari vataurire mapurisa ari padyo navo.
“Tinofara zvikuru kuti musungwa uyu akabva abatwa mushure memazuva mana ekushambadzwa kwechiziviso ichi. Matikitivha eCriminal Investigations Department (CID) nemapurisa eZRP Mkoba vakakurumidza kuita basa ravo vakanobata musungwa uyu uye ari kutarisirwa kuzopinda mudare munguva pfupi iri kutevera nemhosva yehumhondi,” vanodaro.
Insp Mahoko vanoyambira veruzhinji kuti vasiyane nemhirizhonga sezvo kakawanda kacho ichigumisira nekukuvara kana kufa kwevanhu.
