Online Reporter
Kingstone Mapupu
MURUME wekuBeitbridge anonzi Halbane Moyo (48) akasungwa nematikitivha eCriminal Investigations Department (CID) nekuda kwemhosva makumi maviri dzekuba zvinhu zvakasiyana-siyana mudzimotokari.
Mhosva idzi dzinonzi dzakaparwa kubva muna Zvita gore rapera kusvika musi wa21 Kukadzi gore rino.
Musungwa uyu anonzi aiba zvinhu zvakasiyana mudzimotokari mushure mekuvhura madhoo nemahwindo nechisimba.
Mutauriri wemapurisa echikamu cheCID, Detective Inspector Rachel Muteweri, vanoti vedzimotokari vaibirwa zvinhu zvinosanganisira nhare, laptops nemari.
Vanoti gava rakazodambura musungo nemusi wa22 Kukadzi gore rino apo matikitivha vakawana mashoko ekuti musungwa uyu aiba zvinhu mudzimotokari.
Izvi zvinotevera kubiwa kwakange kwaitwa mari mune imwe motokari nemusi wa21 Kukadzi.
“Matikitivha akaronda murume uyu vachishandisa mashoko avakawana ndokunosunga gororo iri vachibva vawana hydraulic jack, nhare nembatya dzakasiyana nemasub-woofers mukati mezvinhu zvaiva zvabiwa,” vanodaro Det Insp Muteweri.
“Murume uyu akatomira mudare reBeitbridge Magistrates Court nemusi wa23 Kukadzi apo nyaya yake yakadarikidzwa kumberi nekudaro achadzoka zvakare mudare munguva iri kutevera,” vanodaro Det Insp Muteweri.
Vanotenda veruzhinji nekubatsira mapurisa nemashoko akaita kuti nhubu iyi isungwe.
“Kune vane mashoko avanoda kusvitsa kumapurisa, vanokurudzirwa kuridza nhare panhamba dzinoti (0242) 703631 kana PGHQ WhatsApp panhamba dzinoti 0712 800 197,” vanodaro Det Insp Muteweri.
