Online Reporter
Tendai Vambe
MURUME ane makore 38 ekuberekwa wekuChipinge akawanikwa akarembera mumuti pamba pavo svondo rapera, mushure mekunge anetseka mupfungwa nekuda kwezvinhu zvaakasiya kuSouth Africa paakadzingwa munyika iyoyo.
Mutauriri wemapurisa mudunhu reManicaland, Assistant Inspector Wiseman Chinyoka, vanotsinhira chiitiko ichi uye vakadudza kuti mushakabvu ndiLuke Sithole wekuWatershed Village, pasi paShe Mapungwana kuChipinge.
Vanoti Sithole anga achinetseka mupfungwa kubva paakadzingwa kuSouth Africa muna Chivabvu, uye aigara achitaura nezvezvinhu zvaakanga asina kukwanisa kutora kuti auye nazvo.
Asst Insp Chinyoka vanoti baba vaLuke, VaMike Sithole (72), vakaudza mapurisa kuti mwanakomana wavo anga achinetseka zvikuru mumwedzi ichangopfuura.
“Baba vaLuke vakati mushure mekudzingwa kuSouth Africa muna Chivabvu, mwanakomana wavo aigara achichema-chema nezvezvinhu zvaakasiya kunyika iyoyo. Vakati Luke aigara achinetseka nezvekudzosa zvinhu izvozvo uye aiwanzotaura nezvazvo,” vanodaro Asst Insp Chinyoka.
Mapurisa anoti Sithole akaenda kunorara sezvaaiita nguva dzose manheru emusi wa11 Gunyana.
Zvisinei, mangwanani akatevera, baba vake pavakaenda kunomuona, vakaona kuti akanga asisiri muimba yake yekurara.
Mushure mekutsvaga pamba pacho, VaMike Sithole vakawana mwanakomana wavo akarembera pabazi remuti kunze kwemba yavo, uye vakabva vazivisa mapurisa ekuChipinge (ZRP Chipinge) nezvenyaya yacho.
Mapurisa akaenda panzvimbo yacho uye mutumbi uyu wakazotakurwa kuenda kuchipatara cheChipinge District Hospital kuti unoongororwa chikonzero cherufu.
Asst Insp Chinyoka vanoti hapana tsamba yakawanikwa panzvimbo yacho inoratidza kuti aida kuzviuraya, uye ongororo dzekutanga hadzina kuratidza humbowo hwekuti pane mumwe munhu akamukuvadza.
“Nyaya iyi iri kutorwa senyaya yekufungidzirwa kuzviuraya. Ongororo dzichiri kuenderera mberi,” vanodaro.
Asst Insp Chinyoka vanokurudzira veruzhinji vari kusangana nematambudziko ane chekuita nemanzwiro kana utano hwepfungwa kuti vatsvage rubatsiro kubva kumhuri, vatungamiri venharaunda, machechi, pamwe nenyanzvi dzinopa mazano.
“Tinogara tichikurudzira vanhu vari kusangana nematambudziko emanzwiro kuti vatsvage rubatsiro. Rubatsiro runogara huripo kuburikidza nemhuri, vatungamiri vechivanhu, machechi, pamwe nenyanzvi dzeutano hwepfungwa,” vanodaro Asst Insp Chinyoka.
Mutumbi waLuke wakaendeswa kumochari yeChipinge District Hospital, uchimirira kuongororwa kuti uonekwe kuti chakakonzeresa rufu urwu, usati wavigwa kuWatershed Village.
