Online Reporter
Hazel Chitepo
MURUME wekuChimanimani akatongerwa kugara mujeri kwemwedzi mitanhatu mushure mekubatwa nemhosva yekubaya mumwe murume nebanga zvakaipisisa uyo aive nechikwereti chake cheUS$10 chenyama yembudzi.
Garikai Tirivangani (34) akabatwa nemhosva yekuedza kuuraya munhu, iyo yaakabvuma, apo akamiswa pamberi pedare reChipinge Magistrates’ Court.
Mutongi munyaya iyi aive vaBishard Chineka uye muchuchisi vari VaIsaac Tangwena.
Nyaya iyi yakaitika nemusi wa28 Kurume paMadongonda tuckshops munzvimbo yeChimanimani National Park.
Dare rakaudzwa kuti Tirivangani akatenga nyama yembudzi yeUS$30 kuna Trymore Nyowana, apo akabva abhadhara US$20, achisiya chikwereti cheUS$10.
Nyowana paakazoti anoda mari yake yaive yasara, vaviri ava vakatadza kunzwanana nekuda kwenyaya iyi vachibva vatanga kupopotedzana.
Shawamwari yaNyowana, iyo isina kutaurwa zita rayo mudare, yakabva yatema Tirivangani nemachete.
Mukudzorera, Tirivangani akabva abaya Nyowana padumbu kamwechete nebanga remhando yeokapi.
Nyowana akakuvara zvakanyanya sezvo matumbu ake akabva abuda kunze.
Banga rakashandiswa mukupara mhosva iyi rakaburitswa mudare sehumbowo.
