Online Reporter
Muchaneta Chimuka
MURUME ane makore 55 okuberekwa anonzi akatsikwa nechitima apo aive akagara pakati penjanji kuMelfort, kuGoromonzi manheru emusi weChitatu svondo rapera.
Mutauriri wemapurisa kudunhu reMashonaland East, Inspector Simon Chazovachiyi, vanoti tsaona iyi yakaitika nenguva dza11 manheru.
Vanoti munhu akatsikwa nechitima ichi haasati azivikanwa sezvo aive asina magwaro akadai sechitupa asi pane fungidziro yekuti ane makore anosvika 25 okuberekwa.
Insp Chazovachiyi vanoti musi uyu, Wellington Pedzisai (55) wekuGranary Park, muHarare aityaira chitima chinotakura zvinhu chine nhamba dzinoti 34853 cheNational Railways of Zimbabwe (NRZ) akananga kwaMutare.
“Paakasvika paMelfort Bridge, chitima chakabva chatsika murume ane makore angangosvika 25 ekuzvarwa ainge akagara munjanji. Akatsikwa ndokutsemuka musoro zvakaita kuti afe pakarepo. Mapurisa eZRP Marondera vakaridzirwa nhare ndokubva vakanotakura mutumbi uyu ukaendeswa kumochari yechipatara cheMarondera Provincial Hospital kunoongororwa nanachiremba,” vanodaro.
Insp Chazovachiyi vanoyambira veruzhinji kuti vasiyane nekatsika kekutambira kana kugara munjanji sezvo zvitima zvinogona kufamba pane ipi zvayo nguva.
Vanokurudzirawo veruzhinji vari kushaya hama yavo yechirume ine makore angangosvika 25 okuberekwa kuti vaende kunotarisa mutumbi uyu kumochari yechipatara cheMarondera Provincial Hospital.
