Murume azama kuzviuraya ka2 zvikaramba, ndokuzotsikwa nemotokari

Lovemore Chazingwa ari KUKADOMA

MURUME aizivikanwa zvakanyanya kuRimuka, kuKadoma nenyaya yekusona shangu, Louis Mugariri, akatsikwa negonyeti ndokufa nemusi weChipiri manheru mushure mekunge ambozama kuzviuraya kaviri kose asi zvichikona pazuva rimwechete iri.

Aizivikanwa zvekare nezita remadunhurirwa rekuti Dread Chipo uye ange ave nemakore 46 okuberekwa.

Pakutanga, akaedza kuzviuraya nekukambaira pasi pegonyeti rinotakura mafuta ezvifambiso iro raida kudira mafuta aya pane imwe service station.

Zvisinei, vamwe vanhu vaivepo vakakwanisa kumudzivisa kuti asatsikwe negonyeti iri.

Murume uyu akazozama zvekare kukambaira nepasi pebhazi raive rakamiswa pane imwe rengi mudhorobha iri.

Izvi akazviita achiitira kuti kana bhazi iri rofamba raibva razomutsika.

Asi vamwe vanhu vakazviona vachibva vataurira mutyairi waro.

Apo Dread aida kutiza kubva panzvimbo iyi, akabva atsikwa negonyeti.

“Akabuda ropa zvakanyanya kubva mumhuno uye akazofa mushure mechinguvana,” anodaro mumwe aive pachiitiko ichi.

“Mapurisa akauya ndokutakura mutumbi uyu kuenda nawo kumochari.”

Dread aigara pabasa pake paMachipisa Shopping Centre, pedyo neThe Star Bar.