Online Reporter
Muchaneta Chimuka
MAPURISA eZimbabwe Republic Police (ZRP) okurudzira veruzhinji kuti vatevedze mitemo inodiwa pakutengesa zvipfuyo pamwe chete nekuzvifambisa kuenda kune dzimwe nzvimbo uye vosiyana nekatsika kekupa mapurisa chiokomuhomwe.
Kurudziro iri inotevera kuwanda kuri kuita nyaya dzekubiwa kwemombe.
Mutauriri wemapurisa mudunhu reMidlands, Inspector Emmanuel Mahoko, vanoti zvakakosha kuti veruzhinji vashande pamwe chete nemapurisa mukurwisa kubiwa kwemombe.
“Magwaro ekufambiswa kwezvipfuyo anoitwa pachena nemapurisa uye pachiongororwa kuti nyakutengesa zvipfuyo ane magwaro ese here anoratidza kuti ndiye muridzi wemombe, mbudzi kana hwai. Anofanirwa kubudisa mabhuku ekudhibhi anoratidza zvakare kuti ndiye muridzi wezvipfuyo zviri kutengeswa kana kufambiswa,” vanodaro.
“Kubhadhara mapurisa pabasa rese iri rekuchenura zvipfuyo imhosva huru nekuti zvese izvi zvinoitwa pachena.”
Insp Mahoko vanoti zvipfuyo zvakakosha kuhupfumi hwenyika nokudaro ngazvichengetedzwe.
“Hakuna zvipfuyo zvinofanira kuurayiwa kana kutengeswa pasina magwaro anobvumidza kuita saizvozvo nekuti ndizvo zvinopa mikana yekuti mbavha dzinge dzichiba. Mbavha zhinji dziri kuuraya mombe dzichitengesa pamadiro nekuda kwekuti matanho akatarwa pamutemo haasi kutevedzerwa,” vanodaro.
Insp Mahoko vanoti mushure meongororo kana pachinge paonekwa kuti zvipfuyo hazvina kubiwa, mupurisa anosaina gwaro rinodaidzwa kunzi ZRP Form 392 iro rinopa mvumo yekutengesa kana kufambisa zvipfuyo.
