admin
VANHU vanoputa fodya vanokurudzirwa kuti vasaputire panzvimbo dzinenge dziine veruzhinji sezvo zvichikanganisa utano hwevamwe uye imhosva kuita izvi.
Mashoko aya akataurwa negurukota rezveutano nekurerwa kwevana, Dr David Parirenyatwa, nguva yadarika kuHighfield, muguta reHarare pakuparurwa kwechirongwa chekurwisa kutengeswa kwezvinodhaka, cheIntenational Day Against Drug and Illicit Trafficking.
Chirongwa ichi chakaparurwa panguva iyo Zimbabwe ichangobva kubatana nedzimwe nyika dzepasi rose mukupemberera zuva rekusaputa fodya, reWorld No Tobacco Day.
“Zvisinei kuti fodya icharamba ichirimwa munyika, kuputa fodya pajekerere hakukurudzirwe uye inotova mhosva kuiputa munzvimbo dzakaita semahotera.
“Matanho aya ari kutorwa kuitira kuti vanoputa fodya vasakanganise utano hwevamwe kuburikidza nekufema hutsi hwefodya,” vanodaro Dr Parirenyatwa.
“Ticharamba tichiedza nepose patinogona kuti vanhu vave neruzivo rwakazara pamusoro pematambudziko anokonzerwa nekuputa fodya pajekerere.”
Vachitaurawo pachiitiko chimwe chete ichi, regional drug resistant TB advisor kusangano reWorld Health Organization (WHO), Dr Wilfred Nkhoma, vanoti vari kuita ongororo maringe nefodya – kutengeswa nekushambadzwa kwayo – nedonzvo rekuona kuti veruzhinji vari kuziviswa here pamusoro penjodzi yekuputa fodya.
“Fodya inokonzera zvirwere zvakaita serurindi (tuberculosis), kukanganisika kwemapapu nezvimwe zvakasiyana,” vanodaro Dr Nkhoma.
Online Reporter