Online Reporter
Abel Ndooka
MWAKA mutsva wecricket weNational Premier League (NPL) wakavamba svondo radarika apo shasha ya2024, Takashinga Patriots 1, yakatanga nekuzvambaradza Queens Sports Club ne134 runs kuKwekwe Sports Club.
Gore rino, mutambo uyu uchange uchikwikwidzwa nezvikwata 14, uye NPL yakatambira zvikwata zvitsva zvishanu zvinoti Chiredzi Cricket Club, Methane Lions, Eastern Titans, Alex Sports Club neAmakhosi 2.
Zvikwata zvose zvichatamba mitambo 91 murwendo urwu, zvichirwira kubvuta mukombe weNPL kubva kuTakashinga Patriots 1.
Mune mimwe mitambo yakatora nzvimbo svondo radarika, chikwata cheWestside — icho chakapedza chiri pechipiri mwaka wadarika — chakakundwa ne59 runs neTakashinga Patriots 2 kuOld Hararians. Nerimwe divi, chikwata cheRangers chakakunda cheMbizo ne172 runs pamutambo wakatambirwa kuKwekwe Sports Club.
Zvichakadaro, mutambo wechipiri weTest match pakati pechikwata chenyika chemaChevrons neNew Zealand wakatanga musi weChina svondo rino uye unotarisirwa kuzopera musi wa11 Nyamavhuvhu.
Mutambo wekutanga, uyo wakatambirwa kuQueens Sports Club, kuBulawayo, maChevrons akakundwa ne9 wickets.
