Online Reporter
Kingstone Mapupu
MURUME aityaira rori rerudzi rweShacman truck iro raidhonza matirera maviri mumugwagwa Masvingo-Mbalambala, kuZvishavane akafa mushure mekunge motokari iyi yapoya mumugwagwa ndokunowira mumvura pabhiriji rwerwizi rwaNgezi nguva pfupi yadarika.
Mutauriri wemapurisa kudunhu reMidlands, Inspector Emmanuel Mahoko, vanoti Silas Nyengetera (52) wekwaSabhuku Tarusenga kwaMambo Mazungunye, kuBikita ndiye akafa mutsaona iyi.
“Silas Nyengetera aityaira rori mumugwagwa Masvingo-Mbalambala apo akanosvika pazambuko rerwizi Ngezi kuZvishavane nemusi wa10 Kubvumbi nenguva dza1600 hours motokari yake yakabva yakapoya mumugwagwa ndokunowira murwizi ichibva yany’ura,” vanodaro Insp Mahoko.
Vanoti musoro werori iri zvose nematirera acho maviri zvakabva zvanyura mumvura zvekutadza kuonekwa.
“Silas Nyengetera aityaira rori rerudzi rweShacman truck raidhonza matirera maviri apo aiva oga. Paakasvika pachinhambwe che113 kilomertre peg pazambuko rerwizi Ngezi, rori iri rakapoya mugwagwa richibva ranowira murwizi,” vanodaro Insp Mahoko.
Vanoti mutyairi uyu akatadza kubuda mumotokari iyi achibva angofiramo.
“Mashoko etsaona iyi akabva asvitswa kumapurisa eZRP Zvishavane avo vakamhanyirako pamwechete nevechikamu cheZRP Sub Aqua Unit vachibva vaburitsa mutumbi wemurume uyu nemusi wa11 Kubvumbi nenguva dza1630 hours,” vanodaro Insp Mahoko.
Vanoti senguva dzose, vanoramba vachiyambira vatyairi vedzimotokari kuti vatevedze mitemo yemumigwagwa kuitira kudzivirira tsaona dzerudzi urwu.
