adminMITAMBO yakaita semadhirama yave kuzoitwa muzvikoro zvose zvepuraimari nesekondari sezvimwe zvidzidzo apo vana vanenge vachiverenga pamwe nekunyora pamusoro pazvo.
Nekuda kwedanho iri, zvikoro zviri kukurudzirwa kukoshesa mitambo yakadai sezvo vamwe vana vachikwanisa kuzowana raramo kubva mairi mune remangwana.
Kurudziro iyi yakaitwa nguva pfupi yadarika naProvincial Education Director wekuMatebeleland South, Mai Thumisang Thabela, kumakwikwi emitambo anorongwa nesangano reNational Association of School Heads (Nash), emadhirama ayo akaitirwa pachikoro cheThekwane High, kuMatebeleland South.
“Tave kutanga zvidzidzo zvemadhirama muzvikoro zvose zvepuraimari nesekondari nedonzvo rekubatsira vana vane matarenda sezvo vamwe vachiwana raramo nazvo uye zvinosimudzira tsika nemagariro,” vakadaro Mai Thabela.
Makwikwi emadhirama aya aiva nedingindira rinoti: “Mwanasikana ngaasimudzirwe muraramo yake”.
Mai Thabela vakati madhirama ari kufambidzana neMellenium Development Goal number 3, iyo inokoshesa kusimudzirwa kwevanhukadzi munyika.
Vaiva vaongorori pamakwikwi aya vadzidzisi vepaMidlands State University pamwe neveIntwasa Theater Arts.
Chikoro cheGifford High, chekuBulawayo, ndicho chakakunda zvimwe zvose.
Zvikoro zvaikwikwidza zvakabva kumapurovhinzi akasiyana, uye zvaisanganisira Howard High yekuMashonaland Central, Mpopoma High yekuBulawayo, Moleli High iyo yaimirira Mashonaland West, Christ Ministries yaimirira Harare neChaplin High yekuMidlands.
Zvimwe ndezvinoti Empandeni High yekuMatebeleland South pamwe neChristian College neFatima High izvo zvaimirira Matebeleland North.
Online Reporter