Online Reporter
Kingstone Mapupu
MUZVINHABHIZIMISI aishandira panzvimbo yekwaMonera kudunhu raMambo Nyamweda, kuMhondoro akazvisungirira mubhawa anetsana nemudzimai wake.
Nyaya iyi yakaitika nguva pfupi yadarika paBottle Store rekwaMaponga panzvimbo yemabhizimisi iyi.
Mutevedzeri wemutauriri wemapurisa kuMashonaland West, Assistant Inspector Belinda Nyazire, vanoti Last Taurayi Mahlathini (48) aibva mumusha waSabhuku Museza kudunhu raMambo Nyamweda akatadza kuwirirana nemudzimai wake apo vakatanga kupopotedzana nekuda kwenyaya dzisina kutsanangurwa.
“Last Taurayi Mahlathini akakakavadzana nemudzimai wake, Mirriam Mutambi (37), zvakakonzera kuti Mahlathini adzingirire mudzimai wake nebanga achida kumubaya naro,” vanodaro Asst Insp Nyazire.
Vanoti mudzimai uyu akazokwira bhazi kuenda kunozivisa vamwene vake, Mai Faustina Mahlathini.
“Mirriam Mutambi navamwene vake vakazoenda kubottle store rekwaMaponga iri vachida kunotaura naLast Taurayi Mahlathini nekuda kwenyaya iyi. Murume uyu akaramba kutaura navo vachibva vadzokera vachimusiya, rinova zuva ravakagumisira kuonana naye,” vanodaro Asst Insp Nyazire.
Vanoti VaEdward Maponga (34) vanova muridzi webhawa reMaponga Bottle Store apo pairenda Mahlathini, ndivo vakagumisira kuona Mahlathini nemusi wa12 Kukadzi nenguva dza8 usiku achinzi aivhara bhawa rake.
“Shamwari yemuchakabvu uyu anonzi Tatenda Nhekedza (34) akazoenda pabhawa iri reMaponga Bottle Store achida kuona mumwe wake ndokunodongorera mukati nepahwindo achibva aona mutumbi waLast Taurayi Mahlathini wakarembera mumapuranga echengo chebhawa iri akazvisungirira netambo,” vanodaro Asst Insp Nyazire.
Vanoti Nhekedza akazozivisawo mumwe muzvinabhizimisi panzvimbo iyi, Gertrude Marumbeyi (32), uyo akazoenda kunomhan’ara kumapurisa eZRP Nyamweda Base vachibva vatanga kufeya nyaya iyi.
“Mutumbi uyu wakazotakurwa kuendeswa kumochari yechipatara cheNorton wakamirira kuongororwa nanachiremba,” vanodaro Asst Insp Nyazire.
Vanoyambira vanhu vari muwanano nevamwewo kuti kana vatadza kunzwanana ngavatsvage vayananisi vakaita semapurisa, vakuru vedzisvondo, masabhuku, madzishe, makanzura nevamwe vatungamiri vakasiyana munzvimbo dzavanogara.
“Kuzviuraya nekurwisana hakugadzirise zvinhu asi kuti zvinotowedzera matambudziko,” vanodaro.
Zvakadai, kune mumwewo murume wechidiki wekwaUtete kunzvimbo yemabhizimisi yekwaNyamweda anonziwo akazvisungirira nekuda kwemakuhwa nguva yadarika.
Mambo Nyamweda, VaNobert Mandaza, vanoti vari kushushikana nevanhu vari kuzviuraya mudunhu ravo nekuda kwetunyaya tusina maturo.
“Inyaya inosuwisa kuti tine varume vaviri vakafa vachizvisungirira. Tinokurudzira vanhu kupira matambudziko avo kune vakuru vari padyo navo kwete kuzviuraya,” vanodaro Mambo Nyamweda.
