Online Reporter
Muchaneta Chimuka
MAPURISA ari kuferefeta nyaya yemwanakomana ane makore 12 okuberekwa uyo ane mutumbi wakawanikwa musango wakarembera mumuti kuBindura.
Mutauriri wemapurisa mudunhu reMashonaland Central, Inspector Milton Mundembe, vanotsinhira nezverufu rwaClive Chimanikire, wekuArcadia Farm, kuBindura, vachiti mutumbi wake wakawanikwa nemumwe mufudzi wemombe wakarembera mumuti.
“Musi wa27 Nyamavhuvhu gore rino nenguva dza1600 hours, Clive Chimanikire akabika svutugadzike nemupunga, izvo asina kudya panguva iyoyo, asi kuti akapa baba vake, Ephraim Chimanikire (60), avo vakazonokanya zvidhinha zvavo pedyo nerwizi rwaPote. Clive akabva pamba ndokudzoka kuma1400 hours, ndokupinda muimba yokubikira, ndokudya mupunga uyo waainge asiya muranji bhokisi yake,” vanodaro.
Insp Mundembe vanoti Mai Loice Majoni (42), vanove hanzvadzi yaClive, avo vaigara naye, vakamukumbira kuti avaperekedze kuchibhorani, uye panguva iyi anonzi akabva pamba asina waaudza kwaaienda.
“Nezuva rimwe chetero munguva dzemanheru, Brain Chimutindo (21), anove aifudza mombe papurazi reArcadia akaona mutumbi waClive wakarembera mumuti wakasungwa netambo pahuro, achibva azivisa Trymore Gama (40) wepapurazi iri. Vakabva vaenda panzvimbo iyi. Mushure mezvo, vakazozivisa Loice Majoni, ndokunomhan’ara kumapurisa eZimbabwe Republic Police Bindura Rural, avo vakaenda kunoita ongororo panzvimbo iyi,” vanodaro.
Insp Mundembe vanoti mutumbi uyu wakazoendeswa kumochari yeBindura Provincial Hospital kunovhenekwa nanachiremba. Vanotizve hapana zvakaipa zviri kufungidzirwa maringe nefiro yake.
“Chikumbiro chedu kune voruzhinji ndechokuti kana paine vane ruzivo maringe nefiro yake vazivise mapurisa ari pedyo sezvo ongororo ichiri kuenderera mberi,” vanodaro.
Sekuru vaClive, VaSherlock Mwansa Ailaka, vanoti vakashamiswawo nerufu rwemuzkuru wavo, urwo rwakauya vasingafungidziri.
“Clive aive mudzidzi ane unyanzvi paSOS Hermann Gmeiner Primary School, apo aiita Grade 5 uye aida nhabvu zvakanyanya” vanodaro.
Zvichakadai, Clive akavigwa kuMbire nemusi weChipiri svondo rino.
