Online Reporter
Muchaneta Chimuka
MURUME ane makore 41 okuberekwa wekuChitungwza, uyo akawanikwa aine mbanje inokosha US$90 mubhegi rake, akatongerwa kugara mujeri kwemwedzi 30.
Mutongi wedare reChitungwiza Magistates’ Court, Batsirai Madzingira, vakatemera Happyson Mashamba wepanhamba 2125 Nyatsime New Stands, Chitungwiza chirango chekugara mujeri kwemwedzi 30 mushure mekubvuma kwake mhosva.
Vakazomubvisira mwedzi mitanhatu pachirango ichi zvakaita kuti asare nemwedzi 24 izere yekupika.
Muchuchisi Shamiso Charmaine Mwapangira vakaudza dare kuti nomusi wa18 Nyamavhuvhu munguva dzemangwanani, mapurisa ekuchikamu cheCriminal Investigations Department – Drugs and Narcotics, muHarare vakatambira mashoko enyevero ekuti Mashamba akanga aine zvinodhaka ari panzvimbo yeUnit C – Junction kuChitungwiza.
Vachishandisa mashoko aya, vakaenda kunzvimbo iyi vachibva vaita mahwekwe naye achifamba padyo neRedan Fuel Service Station akabereka bhegi (satchel) reruvara rwupfumbu.
Matikitivha aya akaenda kwaari achibva azvizivisa kuti vainge vari vanaani. Mushure mezvo, vakamusecha mubhegi rake umo vakawana muine bepa repurasitiki riine mbanje.
Vakaenda naye kuHarare Main Post Office uko vakanoyera mbanje iyi ndokuona ichirema makgs 0,938 uye ichikosha US$90.
Vakabva vamusunga uye akabvuma mhosva yake mudare pasina kukakama.
Mashamba akatongwa nemhosva yekuwanikwa aine zvinodhaka pasi pemutemo weUnlawful Possession of Dangerous Drugs as Defined in Section 157 (1) of the Criminal Law Codification and Reform Act Chapter 09:23).
