admin
Cornelius Luphahla
ZIDIDEKILE njalo azilamathe izakhamizi zesigabeni seSizinke eLupane ngemva kokuba kubonakale unwabu luphezulu kwembiza ebiseziko emfeni emini libalele.
Imbedumehlwana le yenzakale ngoLwesine kuviki ephelileyo lapho okubonakale khona unwabu emzini kaMelusi Dube emfeni yabantwabakhe uElmon loNdaba abafe engozini yomgwaqo ngoLwesibili bevela eGoli.
Unwabu lolu kucatshangelwa ukuba lwaluthunywe ngesinye isakhamuzi uMkhonto Ndlovu siphindisela ukufa komntanaso uLungile Ndlovu okubikwa wabulawa yila madoda eGoli.
UMthunywa ukhulumisane lesinye isakhamuzi sakule indawo uNkosazana Mercy Ncube ochaze ukuthi laye wayekhona mhla kubonakala unwabu lolu phezulu kwembiza emfeni njalo kalamathe.
“Angilankani ngesiga esenzakala koDube njalo kangizake ngibone unwabu oluhlala phezulu kwembiza eseziko ngimdala ngingaka.
“Sathi sihlezi emthunzini wemkulwini esasiphekela phambili kwawo sabona inkalakatha yonwabu oluluhlaza tshoko soluthe nama phezulu kwembiza yenyama ixhwatha eziko.
“Kakho owasondelayo ezimbizeni abantu babalekela khatshana lwazihlalela unwabu lalo okwamahola angaba mabili imbiza zaze zatsha kungela oluxotshayo,” kutsho uNkszn Ncube.
Uqhubekele phambili njalo walandisa ukuba ngemva kwalokho unwabu lolu lwabonakala lungasekho phezulu kwembiza le.
“Kwathi ngemva kwesikhathi eside sabona unwabu lolu lungasekho phezulu kwembiza le. Noma nje lwasuka kodwa kakho owaba lesibindi sokuyafika kuzo saze sachitheka.
“Ngemva kwalokho sezwa udletshana lokuthi unwabu lolu lwaluthunyiwe njalo nguye futhi owathunywa ukuyabhewula abafi kuphindiselwa ukubulawa komntanakhe eGoli,” kutsho uNkszn Ncube.
Omunye wezakhamizi zakule indawo othande ukubizwa ngokuthi nguNdlovu uchaze ukuthi ngemva komngcwabo lo uDube wahamba wayaxolisa.
“Kuthiwa kwathi ngemva komngcwabo uDube wahamba ezinyangeni zamtshela ukuthi kayexolisa ngoba abantwabakhe yibo abamqalayo ngokubulala umntanakhe. Ngakho-ke wahamba wayaxolisa uNdlovu wathi nxa esafuna ukuphila lomdeni wakhe kamhlawule ngenkomo ezinhlanu,” kutsho uMnu Ndlovu.
Ebuzwa ngale indaba uMnumzana Mkhonto Ndlovu uchaze ukuthi indaba le yenzakala kodwa kakwazi ukuthi unwabu lwaluvela ngaphi.
“Indaba le ngiyayazi kodwa angazi ukuthi unwabu lwavela ngaphi ngakho lowo othi yimi engaluthumelayo kutsho ukuthi wazi ngcono ngomntanami ngoba mina ngahambela ukufa komntanami ngingazi ukuthi ubulewe ngubani lakhathesi lokhu ngisadinga,” kutsho uMnu Ndlovu.
Usobhuku wakule indawo uMnu Samson Sibanda uthe indaba le uyayazi ngoba laye wayekhona emfeni le.
“Indaba le yenzakala ngikhona njalo ngalubona unwabu lolo phezulu kwembiza kodwa angazi ukuthi kwakuhambe njani, lami ngakutshiya kunjalo,” kuphetha uMnu Sibanda.
Online Reporter